Эквадор ҳукумати Мексика устидан Халқаро жиноят судига шикоят қилиб чиқди. Бу ҳақда Anadolu нашри хабар берди.
Манбада айтилишича, Эквадор томонидан коррупцияда айбланиб қидирувга берилган мамлакат собиқ вице-президенти Хорхе Глас декабрь ойидан бери Мексиканинг Китодаги элчихонасида яшаб келган. Кито ҳукумати шу омилни инобатга олиб, Мексика устидан шикоят қилган.
Олдинроқ Андрес Мануэл Лопес Обрадор бошчилигидаги Мексика ҳукумати Эквадорнинг Даниэль Нобоа қўл остидаги ҳукуматини Мексиканинг Китодаги элчихонасига бостириб кирганлиги учун судга берган эди. Эквадор расмийлари ўз хатти-ҳаракатларига асос сифатида Хорхе Гласнинг элчихонага беркинганини келтирган. Оқибатда икки давлат ўртасида сиёсий инқироз келиб чиқиб, дипломатик муносабатлар узилган эди.
Эквадор расмийлари 2024 йил 5 апрелда Китодаги Мексика дипломатик миссияси биносида Хорхе Гласнинг ҳибсга олиниши қонунчиликка ҳар томонлама мос келишини билдирган. Ушбу ҳаракат дипломатик муносабатларни узиш учун асос бўла олмаслигини билдирган.
Глас ўз мамлакати адлия тизими томонидан коррупцияда айбланиб қидирувга берилган ва декабрь ойидан бери Мексика дипломатик штаб-квартирасида бошпана топган. Ҳозирда 54 ёшли сиёсатчи Гуаякилдаги “Қоя” номи билан машҳур бўлган қаттиқ режимли қамоқхонага кўчирилган.
11 апрель куни Мексика Халқаро судга шикоят аризаси билан мурожаат қилиб, Эквадорни Бирлашган Миллатлар Ташкилотидан чиқариб юборишни сўраган. Элчихонадаги воқеа учун кечирим талаб қилган.
Мексика ҳозирда Эквадор билан дипломатик алоқаларини узиб, элчихонаси ходимларини мамлакатдан чақириб олгани хабар қилинган. Элчихонада юз берган ҳолат минтақадаги аксарият давлатлар томонидан қораланган.
Изоҳ (0)