АҚШ Тайванга 360 миллион долларлик қурол сотади. Бу ҳақда Пентагон расмийлари баёнотига асосланиб, Reuters хабар берди.
Манбада айтилишича, ҳарбий савдо битими доирасида АҚШ Тайванга ҳарбий дронлар ҳамда ракеталар етказиб беради. АҚШ Давлат департаменти ва Пентагоннинг Миллий хавфсизлик бўйича агентлиги ушбу савдо пакетини расман тасдиқлаган.
“Янги ҳарбий савдо пакети Тайваннинг хавфсизлигини яхшилашга ёрдам беради ва минтақада сиёсий барқарорлик, ҳарбий мувозанат ҳамда иқтисодий тараққиётни кафолатлайди”, — дейилган Пентагон 18 июнь куни эълон қилган баёнотда.
Ҳарбий савдо пакети тахминан 60,2 миллион долларлик Switchblade 300 пиёдалар ва зирҳли техникага қарши ўқ-дорилари, тегишли жиҳозлар ҳамда тахминий қиймати 300 миллион долларлик АLTIUС 600М-V дронларини ўз ичига олади. Пакет таркибида ,шунингдек, ҳаракатланувчи ўқ-дорилар — кичик ҳажмли бошқариладиган ракеталар ҳам бўлиб, улар ҳужумга йўналтирилгунга қадар нишон ҳудуди атрофида уча олади.
Тайван расмийлари янги савдо пакети учун Вашингтонга миннатдорчилик билдирган. Ушбу ташаббус Тайван мудофааси учун муҳим эканлиги билдирилган.
“Хитой коммунистларининг Тайван атрофида тез-тез ҳарбий амалиётлар ўтказиши шароитида АҚШ билан келишилган ушбу қурол савдоси реал вақтда душманни аниқлаш ва зарба бериш қобилиятига ҳисса қўшади. Ушбу янги қуроллар душман таҳдидларига тезда жавоб қайтара олади”, — дейилади Тайван расмийлари баёнотида.
Изоҳ (0)