AQSH Tayvanga 360 million dollarlik qurol sotadi. Bu haqda Pentagon rasmiylari bayonotiga asoslanib, Reuters xabar berdi.
Manbada aytilishicha, harbiy savdo bitimi doirasida AQSH Tayvanga harbiy dronlar hamda raketalar yetkazib beradi. AQSH Davlat departamenti va Pentagonning Milliy xavfsizlik bo‘yicha agentligi ushbu savdo paketini rasman tasdiqlagan.
“Yangi harbiy savdo paketi Tayvanning xavfsizligini yaxshilashga yordam beradi va mintaqada siyosiy barqarorlik, harbiy muvozanat hamda iqtisodiy taraqqiyotni kafolatlaydi”, — deyilgan Pentagon 18-iyun kuni eʼlon qilgan bayonotda.
Harbiy savdo paketi taxminan 60,2 million dollarlik Switchblade 300 piyodalar va zirhli texnikaga qarshi o‘q-dorilari, tegishli jihozlar hamda taxminiy qiymati 300 million dollarlik ALTIUS 600M-V dronlarini o‘z ichiga oladi. Paket tarkibida ,shuningdek, harakatlanuvchi o‘q-dorilar — kichik hajmli boshqariladigan raketalar ham bo‘lib, ular hujumga yo‘naltirilgunga qadar nishon hududi atrofida ucha oladi.
Tayvan rasmiylari yangi savdo paketi uchun Vashingtonga minnatdorchilik bildirgan. Ushbu tashabbus Tayvan mudofaasi uchun muhim ekanligi bildirilgan.
“Xitoy kommunistlarining Tayvan atrofida tez-tez harbiy amaliyotlar o‘tkazishi sharoitida AQSh bilan kelishilgan ushbu qurol savdosi real vaqtda dushmanni aniqlash va zarba berish qobiliyatiga hissa qo‘shadi. Ushbu yangi qurollar dushman tahdidlariga tezda javob qaytara oladi”, — deyiladi Tayvan rasmiylari bayonotida.
Izoh (0)