Хитой армиясининг Шарқий жанговар қўмондонлик зонаси қўшинлари Тайван атрофида кенг қамровли ҳарбий машғулотлар бошлади. Бу ҳақда Хитой Мудофаа вазирлиги хабар берди.
23-24 май кунлари бўлиб ўтадиган машғулотларда қуруқлик, денгиз, ҳаво ва ракета кучлари иштирок этади. Хитой Мудофаа вазирлиги матбуот котиби Ли Сининг айтишича, машғулотларда армиянинг жанговар тайёргарлиги ва асосий нишонларга биргаликда аниқ зарбалар бериш синовдан ўтказилади. Ҳарбий кемалар ва самолётлар Тайван атрофида жанговар патруллик қилади.
Шунингдек, бу Тайван мустақиллигига интилаётган айирмачи кучлар учун қаттиқ жазо ҳамда ташқи кучларнинг провокациялари ва аралашувидан қаттиқ огоҳлантиришдир, — деди Ли Си.
Ўз навбатида, Тайван Мудофаа вазирлиги оролга битта самолёт ва 12 та Хитой кемаси яқинлашаётганини маълум қилган. Жумладан, Хитой самолёти оролнинг ҳаво мудофаасини аниқлаш зонасига жанубдан кириб келгани ва тахминан 72 километр масофага яқинлашгани таъкидланган.
Тайван Мудофаа вазирлиги Хитой томонидан ўтказилаётган машъулотларни минтақавий тинчлик ва хавфсизликни бузувчи “провокация” деб баҳолаган.
Изоҳ (0)