Исроил АҚШ президенти Жо Байден томонидан таклиф этилган урушни тугатиш ва Ғазо секторидаги можарони ҳал этиш режасини қабул қилди. Бу ҳақда Исроил бош вазири Биньямин Нетаньяхунинг ташқи сиёсат бўйича маслаҳатчиси Офир Фалк хабар берди.
Нетаньяхунинг маслаҳатчисига кўра, Байденнинг режасини сезиларли даражада қайта ишлаш лозим. Фолк АҚШ президентининг таклифини “биз рози бўлган келишув” деб атади.
“Бу унчалик яхши келишув эмас, лекин гаровга олинганларнинг ҳар бирини озод қилишни жуда хоҳлаймиз”, — деди у.
Бош вазир маслаҳатчиси Исроил ўзининг ўт очишни тўхтатиш шартларидан воз кечмаслигини айтди. Бу шартлар гаровга олинганларнинг барини озод қилиш ва “ҲАМАС”ни бутунлай йўқ қилишни англатади. Байден таклиф қилган режага кўра, можарони ҳал этиш уч босқичда амалга ошиши лозим:
- олти ҳафталик оташкесим, унинг давомида гаровга олинганлар озод қилинади ва Ғазо секторига инсонпарварлик ёрдами етказилади;
- жанговар ҳаракатларни тўлиқ тўхтатиш, Исроил қўшинларини Ғазодан тўлиқ олиб чиқиб кетиш ва конфликтга борган томонлар ўртасида музокаралар бошлаш;
- уруш пайтида вайрон қилинган ҳудудларни тиклаш.
Фаластиннинг ҲАМАС ҳаракати ўт очишни тўхтатиш ва Исроил қўшинларини Ғазодан олиб чиқиб кетиш таклифини олқишлашини билдирди.
“ҲАМАС АҚШ президенти Жо Байден нутқидаги сўзларни ва унинг доимий ўт очишни тўхтатиш, Ғазо секторидан ҳарбий кучларни олиб чиқиш, реконструкция қилиш ва асирлар алмашиш ҳақидаги чақириғига ижобий қарайди”, — дейилади баёнотда.
Шунингдек, ҲАМАС кўчирилганларни Ғазо бўйлаб ўз уйларига қайтаришни ва агар Исроил бу мажбуриятни ўз зиммасига олса, маҳбусларни алмашиш бўйича келишувни якунламоқчи экани қайд этилган.
Изоҳ (0)