Андижон вилоятида мактабгача таълим ташкилотларида болаларни овқатлантириш ҳолати ўрганилганда уларнинг айримларида белгиланган талаблар асосида ташкил этилмаётгани аниқланди. Бу масала Сенатнинг Фан, таълим ва соғлиқни сақлаш масалалари қўмитаси мажлисида муҳокама этилди.
Қайд этилишича, Андижон вилояти мактабгача ва мактаб таълими бошқармаси тасарруфида жами 549 та давлат мактабгача таълим ташкилоти бўлиб, уларда 122 386 нафар бола тарбияланмоқда.
103 та (18,8 фоиз) давлат мактабгача таълим ташкилотида болаларни овқатлантириш аутсорсинг усулида ташкил этилган бўлиб, 7 та ауцорсерларга ошхоналар ижарага берилган. Қолган 446 та (81,2 фоиз) давлат мактабгача таълим ташкилотида болаларни овқатлантириш туман ва шаҳар мактабгача ва мактаб таълим бўлими томонидан ташкил этилган.
Сенаторлар ўрганилган давлат мактабгача таълим ташкилотларида тарбияланувчиларни овқатлантириш Давлат мактабгача таълим ташкилотларида соғлом овқатлантиришни ташкил этиш тартиби тўғрисида низом талаблари асосида олиб борилмаётгани аниқланди.
Хусусан, Шаҳрихон тумани 52-сонли давлат мактабгача таълим ташкилоти биноси эски бўлиб, ошхона ташқи ва ички хоналари тўлиқ таъмирталаб, стол, стул ва бошқа жиҳозлар етишмайди. Ошхона санитария-гигиена талабларига жавоб бермайди, тозалаш ишлари ўтказилмаган, болалар учун идиш-товоқлар етарли эмас.
Шунингдек, таом тайёрлаш, озиқ-овқат маҳсулотларини сифатли қабул қилиш, сақлаш учун зарур шароитлар яратилганлиги ўрганилганда, Қўрғонтепа туманидаги 2-сонли давлат мактабгача таълим ташкилотида бракераж комиссияси томонидан маҳсулотлар қабул қилиб олинмаётгани натижасида сифатсиз озиқ-овқат маҳсулотлари кирим қилинган.
Ўрганилган давлат мактабгача таълим ташкилотларида таомномалар низомга зид равишда, яъни 10 кунлик Ягона мавсумий таомнома асосида тузилмаган. Тузилган таомнома Санитария-эпидемиология осойишталиги ва жамоат саломатлиги қўмитаси ҳудудий бўлимлари билан келишилмаган ҳамда таомномаларга киритилган ўзгартиришлар юзасидан далолатнома расмийлаштирилмаган.
“Сенатдан ташкил қилинган ишчи гуруҳ бориб кўрган мактабгача таълим ташкилотлари ишлаши керак эмас. Уларнинг фаолиятини шу бугуннинг ўзида тўхтатиш керак. Олиб келинган маҳсулотлар нотўғри сақланиб, томир отиб юборса, турган жойида чириса… Қайси ошпаз чириган ё униб кетган картошкани ташлаб юборади? Албатта, уларни болаларга едиради”, — деган мажлисда сўзга чиққан Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков.
У, шунингдек, идиш-товоқлар етарли эмаслигини, четлари синиқ ҳолатда эканини айтиб, болаларнинг лабини, лунжини, тилини кесиб олиш эҳтимоли борлигини ҳам билдириб ўтган.
Нурмат Отабеков шундай ҳолатлар аниқланган тўртта тумандаги мутасаддиларга бошқаларга дарс бўлиши учун қаттиқроқ чора кўриш керак, деган фикрда.
Мажлисда сенаторлар томонидан соҳада мавжуд муаммоларни бартараф этиш бўйича таклиф ва тавсиялар билдирилди. Жумладан, жисмоний шахсни биометрик идентификация қилиш (Face-ID) тизими орқали тарбияланувчилар давоматини йўлга қўйиш ҳамда шу асосда озиқ-овқат харажатларининг аниқ ҳисобини юритиш, овқатлантиришни ташкил этиш бўйича бракераж комиссиялари томонидан озиқ-овқат маҳсулотларини қабул қилиб олишда ташкилот раҳбарларининг масъулиятини ошириш, етказиб берилаётган озиқ-овқат маҳсулотлари сифатини назорат қилиш каби таклифлар берилди.
Изоҳ (0)