Andijon viloyatida maktabgacha taʼlim tashkilotlarida bolalarni ovqatlantirish holati o‘rganilganda ularning ayrimlarida belgilangan talablar asosida tashkil etilmayotgani aniqlandi. Bu masala Senatning Fan, taʼlim va sog‘liqni saqlash masalalari qo‘mitasi majlisida muhokama etildi.
Qayd etilishicha, Andijon viloyati maktabgacha va maktab taʼlimi boshqarmasi tasarrufida jami 549 ta davlat maktabgacha taʼlim tashkiloti bo‘lib, ularda 122 386 nafar bola tarbiyalanmoqda.
103 ta (18,8 foiz) davlat maktabgacha taʼlim tashkilotida bolalarni ovqatlantirish autsorsing usulida tashkil etilgan bo‘lib, 7 ta autsorserlarga oshxonalar ijaraga berilgan. Qolgan 446 ta (81,2 foiz) davlat maktabgacha taʼlim tashkilotida bolalarni ovqatlantirish tuman va shahar maktabgacha va maktab taʼlim bo‘limi tomonidan tashkil etilgan.
Senatorlar o‘rganilgan davlat maktabgacha taʼlim tashkilotlarida tarbiyalanuvchilarni ovqatlantirish Davlat maktabgacha taʼlim tashkilotlarida sog‘lom ovqatlantirishni tashkil etish tartibi to‘g‘risida nizom talablari asosida olib borilmayotgani aniqlandi.
Xususan, Shahrixon tumani 52-sonli davlat maktabgacha taʼlim tashkiloti binosi eski bo‘lib, oshxona tashqi va ichki xonalari to‘liq taʼmirtalab, stol, stul va boshqa jihozlar yetishmaydi. Oshxona sanitariya-gigiyena talablariga javob bermaydi, tozalash ishlari o‘tkazilmagan, bolalar uchun idish-tovoqlar yetarli emas.
Shuningdek, taom tayyorlash, oziq-ovqat mahsulotlarini sifatli qabul qilish, saqlash uchun zarur sharoitlar yaratilganligi o‘rganilganda, Qo‘rg‘ontepa tumanidagi 2-sonli davlat maktabgacha taʼlim tashkilotida brakeraj komissiyasi tomonidan mahsulotlar qabul qilib olinmayotgani natijasida sifatsiz oziq-ovqat mahsulotlari kirim qilingan.
O‘rganilgan davlat maktabgacha taʼlim tashkilotlarida taomnomalar nizomga zid ravishda, yaʼni 10 kunlik Yagona mavsumiy taomnoma asosida tuzilmagan. Tuzilgan taomnoma Sanitariya-epidemiologiya osoyishtaligi va jamoat salomatligi qo‘mitasi hududiy bo‘limlari bilan kelishilmagan hamda taomnomalarga kiritilgan o‘zgartirishlar yuzasidan dalolatnoma rasmiylashtirilmagan.
“Senatdan tashkil qilingan ishchi guruh borib ko‘rgan maktabgacha ta’lim tashkilotlari ishlashi kerak emas. Ularning faoliyatini shu bugunning o‘zida to‘xtatish kerak. Olib kelingan mahsulotlar noto‘g‘ri saqlanib, tomir otib yuborsa, turgan joyida chirisa… Qaysi oshpaz chirigan yo unib ketgan kartoshkani tashlab yuboradi? Albatta, ularni bolalarga yediradi”, — degan majlisda so‘zga chiqqan Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Otabekov.
U, shuningdek, idish-tovoqlar yetarli emasligini, chetlari siniq holatda ekanini aytib, bolalarning labini, lunjini, tilini kesib olish ehtimoli borligini ham bildirib o‘tgan.
Nurmat Otabekov shunday holatlar aniqlangan to‘rtta tumandagi mutasaddilarga boshqalarga dars bo‘lishi uchun qattiqroq chora ko‘rish kerak, degan fikrda.
Majlisda senatorlar tomonidan sohada mavjud muammolarni bartaraf etish bo‘yicha taklif va tavsiyalar bildirildi. Jumladan, jismoniy shaxsni biometrik identifikatsiya qilish (Face-ID) tizimi orqali tarbiyalanuvchilar davomatini yo‘lga qo‘yish hamda shu asosda oziq-ovqat xarajatlarining aniq hisobini yuritish, ovqatlantirishni tashkil etish bo‘yicha brakeraj komissiyalari tomonidan oziq-ovqat mahsulotlarini qabul qilib olishda tashkilot rahbarlarining masʼuliyatini oshirish, yetkazib berilayotgan oziq-ovqat mahsulotlari sifatini nazorat qilish kabi takliflar berildi.
Izoh (0)