Самарқанд вилояти Ургут туманида мактаб ўқувчиси Nexia-2 транспорт воситасида 6 ёшли қизчани уриб юборди. Бу ҳақда вилоят ИИБ Йўл ҳаракати хавфсизлиги бошқармаси ахборот хизмати хабар берди.
Қайд этилишича, ҳодиса 2 июнь куни Ургут туманидаги “Янгиҳаёт” маҳалласида содир бўлган. Шу туманда яшовчи фуқаронинг мактабда ўқийдиган фарзанди Nexia-2 машинани ҳайдаб кўчага чиққан. Ҳайдовчилик гувоҳномаси бўлмаган йигит машинани юқори тезликда ҳаракатлантириб келаётиб, йўлнинг бир томонидан иккинчи томонига ўтаётган 6 ёшли қизни уриб юборган.
Қизача шифохонага олиб борилган, аммо кўрсатилган муолажаларга қарамай вафот этган.
Дадамдан сўрамасдан машинани олиб чиққандим. Машинани ювиб чиққанимдан кейин, йўлимдан бирдан югуриб чиқиб қолди. Тормозни босдим, тормоз ҳам ишламади, — дейди 9-синф ўқувчиси.
Ҳодиса юзасидан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Андижон вилоятининг Пахтаобод туманида йўлни кесиб ўтаётган пиёдани Lacetti уриб кетгани, Тошкентда содир бўлган ЙТҲ оқибатида пиёда вафот этгани тўғрисида хабар берилганди.
Изоҳ (0)