Россиянинг Санкт-Петербург шаҳрида ўзбекистонлик эркак Ички ишлар вазирлигининг патент бериш бўлимини портлатиш билан таҳдид қилди. Бу ҳақда “Комсомолская правда” хабар берди.
Полицияга 3 июнь куни Моисеенко кўчасида жойлашган идорани портлатиш бўйича хабар келиб тушган. Ҳуқуқ-тартибот идоралари ходимлари ИИВ биноси атрофидаги ҳудудни кўздан кечириб, хавфли ҳеч нарса топмаган. Шу сабабли эвакуация ҳам амалга ошмаган. Бинони портлатиш ҳақида ёлғон маълумот тарқатган шахс 35 ёшли ишсиз Ўзбекистон фуқароси экани маълум бўлган.
Ҳолат юзасидан 2 май куни Россияга ишлаш мақсадида келган мигрант қўлга олинган. Унга нисбатан террорчилик акти ҳақида ёлғон хабар бериш моддаси бўйича жиноий иш очилган.
2023 йил Россиянинг Ставропол ўлкасида теракт уюштирмоқчи бўлган Ўзбекистон фуқароси қўлга олинганди. Федерал хавфсизлик хизмати ходимлари ҳукумат биноси ёнида бомба портлатмоқчи бўлган 21 ёшли Ўзбекистон фуқаросини ушлаган. Мигрант Ставрополдаги автоювиш шохобчасида ишлагани аниқланган.
Изоҳ (0)