Жиззах, Андижон, Қашқадарё ва Фарғона вилоятларида имтиёзли кредит маблағларини талон-торож қилган шахслар аниқланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Жиззах вилоят бошқармаси томонидан терговга қадар текширув ўтказилган. Текширувда “Э.Б.” фермер хўжалиги раҳбари М.Й. ва бошқалар ҳудудий тижорат банкидан ажратилган 110 минг доллар миқдоридаги имтиёзли кредит маблағлари эвазига сотиб олинган жами 40 бош наслли чорва молларини бошқа шахсларга сотиб юбориб, ушбу маблағларни талон-торож қилгани аниқланган.
Департаментнинг Хўжаобод туман бўлими томонидан ўтказилган терговга қадар текширувда ЯТТ Ф.Й. ва бошқалар ҳудудий тижорат банкидан трикотож ишлаб чиқариш мақсадида ажратилган кредит маблағлари эвазига харид қилинган жиҳозларни нақд пулга сотиб юбориб, трикотаж ишлаб чиқариш фаолиятини йўлга қўймасдан, 434,8 миллион сўм кредит маблағини ўзлаштириш йўли билан талон-торож қилгани маълум бўлган.
Шу каби, департаментнинг Қашқадарё вилоят бошқармаси томонидан ўтказилган терговга қадар текширувда “А.К.” ва “А.Т.” МЧЖ масъул шахслари ҳудудий тижорат банкидан 9 нафар фуқарога тадбиркорликни ривожлантириш мақсадида ажратилган имтиёзли кредит эвазига таъминотчи корхона сифатида техника маҳсулотларини етказиб бермасдан, расмий ҳужжатларга сохта маълумотлар киритиш орқали жами 323 миллион сўм кредит маблағини ўзлаштириш йўли билан талон-торож қилгани аниқланган.
Департаментнинг Фурқат туман бўлими томонидан ўтказилган терговга қадар текширувда эса Фурқат банк хизматлари маркази собиқ раҳбари Д.М. ва бошқалар 5 нафар фуқаро номидан уларнинг хабардорлигисиз “Ф.Б.” ва “Т.I.” МЧЖ ҳамда бошқа тадбиркорлик субъектлари билан сохта шартномалар тузиш орқали 132,3 миллион сўм имтиёзли кредит ажратилишига эришиб, ушбу маблағларни талон-торож қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Сурхондарёда хусусий боғча қуриш учун ажратилган 356 млн сўм кредит маблағлари талон-торож қилингани тўғрисида хабар берилганди. Шунингдек, Тошкент вилоятида фермер хўжалиги 3,1 млрд сўм имтиёзли кредит маблағини ўзлаштиргани маълум бўлган эди.
Изоҳ (0)