Хитойлик олимлар дунёда биринчи бўлиб қандли диабетга чалинган беморни илдиз ҳужайраларини кўчириб ўтказиш амалиёти ёрдамида касалликдан даволади. Тадқиқот натижалари Cell Discovery журналида чоп этилди, деб ёзади “Правила Жизни”.
59 ёшли эркак 25 йил давомида қандли диабетнинг II туридан азият чекиб келган. Касаллик туфайли у ошқозон ости безининг инсулин ишлаб чиқарадиган деярли барча ҳужайраларини йўқотган ва бир неча йил аввал шифокорлар унда буйрак кўчириш жарроҳлик амалиётини ўтказган. Нашр муаллифларининг қайд этишича, бундай беморларда нервлар, буйраклар ва юракларга зарар етиш хавфи юқори ҳисобланади.
Беморни даволаш учун олимлар лабораторияда ошқозон ости безининг сунъий илдиз ҳужайраларини яратди, сўнг уларни беморнинг танасига кўчириб ўтказди. Операция муваффақиятли ўтди ва маълум вақтдан сўнг бемор организмни яна инсулин ишлаб чиқара бошлади.
Трансплантация амалиёти 2021 йилда амалга оширилган. Жарроҳликдан сўнг бемор 11 ҳафта давомида инсулин қабул қилишни тўхтатиб, дори-дармонлар миқдорини аста-секин камайтириб борди. Орадан бир йил ўтиб дорилардан бутунлай воз кечди.
Тадқиқотлар беморнинг ошқозон ости бези фаолияти самарали тикланганини кўрсатмоқда, — деди шифокорлардан бири.
Мутахассиснинг таъкидлашича, бу тиббиёт соҳасида сезиларли ютуқларга эришилганидан далолат беради, келажакда ушбу имконият касалликларни даволашда қўл келади.
Шу пайтгача дунёда биронта ҳам одам диабетдан тўлиқ халос бўлмаганди. Қанд миқдорини меъёрда сақлашнинг ягона йўли тартибли овқатланиш ва мунтазам жисмоний машқлар ҳисобланади.
“Бироқ бу усулнинг самарадорлигини тасдиқлаш учун кўпроқ тадқиқот керак”, —дейди олимлар. Шунингдек, мутахассислар юқори стресс туфайли I тоифа диабетга чалинган одамлар учун ушбу амалиёт мос келмаслигини таъкидлади.
Изоҳ (0)