Keyt Middlton 22-mart kuni e’lon qilgan videomurojaatida o‘zining dahshatli tashxisi bilan qanday kurashayotgani haqida ochiq gapirdi.
2024-yilning 22-mart kuni Uels malikasi saratonga chalinganini e’lon qildi. So‘nggi oylarda Bukingem saroyidan tashvishli xabarlar kelayotganini hisobga olsak, bu xabar ko‘pchilikni hayratda qoldirdi. 22-yanvar kuni Sara Fergyuson ko‘krak bezi saratoni haqidagi qayg‘uli xabar bilan o‘rtoqlashdi; 5-fevral kuni qirol Charlz o‘zining qo‘rqinchli tashxisini e’lon qilib, mamlakat fuqarolarini jiddiy qo‘rqitgandi. Atigi bir yarim oy o‘tgach esa 22-mart kuni Uels malikasi saratonga chalingani haqida ochiqchasiga gapirdi.
Keyt Middlton videomurojaatida 14-yanvar kuni qorin bo‘shlig‘ida jiddiy jarrohlik amaliyotini o‘tkazganini ma’lum qildi. Shifokorlar dastlab zararsiz deb hisoblagan o‘simtani olib tashlashgan, biroq keyingi tekshiruvlar malikaning saraton kasalligiga chalinganini ko‘rsatgan.
Middltonning aytishicha, tashxis ularning oilasi uchun katta zarba bo‘lgan. U va shahzoda Uilyam bu sinovni yengish uchun qo‘llaridan kelganini qilmoqda.
Uilyamning yonimda bo‘lishi menga xotirjamlik va ishonch beradi — sizlar tomoningizdan ko‘rsatilgan sevgi, qo‘llab-quvvatlash va mehr-muhabbat kabi. Bu ikkalamiz uchun juda katta ahamiyatga ega.
Ma’lumki, og‘ir jarrohlik amaliyotidan so‘ng tiklanishim va davolanishni boshlashim uchun biroz vaqt kerak bo‘ldi. Lekin eng muhimi, biz Jorj, Sharlotta va Luiga hammasini boricha tushuntirish va tuzalishimga ishontirishning uddasidan chiqdik.
Ularga aytganimdek: men sog‘lomman va kundan-kunga shifo topishimga yordam beradigan narsalarga e’tibor qaratib, ongimda, tanamda va ruhimda ham tetiklashib boraman.
Malika shuningdek, yanvar oyining oxiridan beri kimyoterapiya olayotganini aytdi. Ammo Keyt Middlton saratonning qaysi turiga chalinganini ochiqlamagan.
Bu vaqt davomida malika Keyt qanday davolangan?
Qorin bo‘shlig‘idagi jarrohlik
Joriy yil boshida Uels malikasi qorin bo‘shlig‘ida muvaffaqiyatli jarrohlik amaliyotini o‘tkazgani tasdiqlandi. Kensington saroyi tomonidan 17-yanvar kuni e’lon qilingan bayonotda aytilishicha, u dunyoga mashhur London klinikasida davolangan.
O‘sha paytdagi bayonotda shunday deyilgan: “Uels malikasi kecha qorin bo‘shlig‘ida muntazam jarrohlik amaliyoti o‘tkazish uchun London kasalxonasiga yotqizilgan. Operatsiya muvaffaqiyatli o‘tdi va u davolanishni davom ettirish uchun uyiga qaytgunga qadar 10-14 kun kasalxonada qolishi kutilmoqda”.
Malikaning ahvoli haqida aniq tafsilotlar oshkor etilmagan, biroq avvalroq saroy matbuot xizmati, bu saraton bilan bog‘liq emasligini aytgandi. Ikki hafta o‘tgach, saroy matbuot xizmati bo‘lajak qirolichaning sog‘lig‘i haqida ma’lumot berib, u oilasi bilan uyga qaytganini va o‘zini yaxshi his qilayotganini tasdiqlagan.
13 kundan so‘ng 42 yoshli malika farzandlari shahzoda Jorj, malika Sharlotta va shahzoda Lui bilan uchrashish uchun Vindzordagi Adelaida kottejiga borgan. U operatsiyadan keyingi tiklanish jarayonini shu yerda davom ettirgan.
Saraton diagnostikasi
22-mart, juma kuni Keyt o‘ziga saraton tashxisi qo‘yilgani haqidagi shaxsiy bayonotini e’lon qildi. Qorin bo‘shlig‘idagi jarrohlik amaliyotidan so‘ng shifokorlar o‘simta xavfli emasligini aniqlagan. Biroq keyingi test natijalari operatsiyadan so‘ng Uels malikasiga rasman saraton tashxisi qo‘yilganligini ko‘rsatdi.
“Bu biz uchun katta zarba bo‘ldi. Uilyam va men bu masalani o‘zimiz hal qilishimiz uchun qo‘limizdan kelganini qilmoqdamiz”, — deydi Uels malikasi. Kattalashgan prostata operatsiyasidan so‘ng saraton tashxisi qo‘yilgan qirol Charlz III dan farqli ravishda Keytning saraton turi rasman e’lon qilinmagan.
Parvarish
Hozirda malika tiklanish uchun profilaktik kimyoterapiya kursini boshlagan. “Shifokorlarim menga profilaktik kimyoterapiyadan o‘tishni maslahat berdi va hozir davolanishning dastlabki bosqichidaman”, — deydi Keyt videomurojaatida.
Ma’lum bo‘lishicha, malika fevral oyining oxiridan beri davolanmoqda va u o‘zining tiklanishiga e’tibor qaratgani uchun kayfiyati yaxshi.
“Aytganimdek, men sog‘lomman va bor diqqatimni tuzalishimga yordam beradigan narsalarga qaratyapman”. Keyt qirollik vazifalariga qachon qaytishi haqida fikr bildirar ekan, qo‘shimcha qilgan holda “Hozir oilamizga biroz vaqt va o‘zimizga e’tibor berishga muhtoj ekanimizni tushunasiz degan umiddaman” — deb javob bergan.
Izoh (0)