Иордания фуқаролари мамлакат пойтахтидаги Исроил элчихонаси қаршисида норозилик намойишлари уюштирди. Бу ҳақда IRNA нашри хабар берди.
Манбада айтилишича, 1 май куни Аммандаги Исроил элчихонаси олдида оломон тўпланган. Намойишчилар Ғазо ва Фаластин қаршилик кучларини қўллаб-қувватлаб, сионист режимнинг Фаластин миллатига қарши жиноятларини қоралаган. Тель-Авив режимига қарши шиорлар кўтариб чиқилган.
Яқин Шарқ нашрлари хабар беришича, Иордания аҳолиси Исроил режимининг Ғазо сектори мазлум халқига қарши содир этаётган жиноятларига қарши ўз норозилигини билдириш учун кўчаларга чиқиб, икки кундан бери оммавий намойишлар ўтказмоқда. Ҳукумат норозилик кучайган ҳудудларда маҳаллий полиция вакилларини кўпайтиргани хабар қилинган.
Норозилик чиқишлари АҚШ давлат котиби Энтони Блинкеннинг Амманга ташрифи ортидан юзага келган. Блинкеннинг Иордания қироли Абдулла II билан учрашуви бошланганидан кўп ўтмай пойтахт кўчаларида одамлар тўплана бошлаган.
Нашрлар тўпланган оломон ва полиция тўқнашуви ҳақида маълумот бермаган. Исроил элчихонаси олдидаги вазият борасида ҳам батафсил маълумот ҳозирча тақдим қилинмаган.
Изоҳ (0)