Мексикада Фаластинни қўллаб намойишга чиққан фуқаролар мамлакат пойтахтидаги Исроил элчихонасига ўт қўйган. Бу ҳақда Марказий Америка манбаларига таяниб, Free Press Journal нашри хабар берган.
Мексикадаги маҳаллий нашрлар ҳодиса чоршанба куни юз берганини маълум қилган. Намойишчилар ёқилғи тўлдирилган шиша идишларни элчихона биносига улоқтириб, уни ёқиб юборишган.
29 май куни Мексика пойтахти Мехикода Фаластин тарафдорларининг ғалаёни юзага келган. Намойишчилар Исроилдан Рафаҳдаги операцияни тўхтатишни талаб қилишган. Ҳукуматни Исроил билан алоқаларни узишга чақирган шиорлар кўтарилган.
Исроил элчихонаси атрофида юз берган тартибсизликда камида 200 нафар фуқаро иштирок этгани айтилган. Улар “Молотов коктейли”дан фойдаланиб, элчихона деворлари остига ўт қўйган.
Намойишчилар йўлларни тўсиб қўйгани боис полиция воқеа жойига тезда етиб келолмаган. Намойишни бостириш пайтида ҳибсга олиш ҳолатлари бўлгани хабар қилинган.
Изоҳ (0)