Бугунги кунда турли-туман егуликлар-у тезпишар овқатлар кенг оммалашган. Улардан бири пицца барчага ёқадиган егуликка айланган. Қуйида пицца таоми ва унинг тарихи ҳақида қизиқарли маълумотлар билан бўлишамиз.
- Гватемалада пицца вулқон оловида тайёрланади.
“Пакая” Гватемалада жойлашган сайёрадаги энг фаол вулқонлардан бири ҳисобланади. Вулқон мунтазам отилиб туришига қарамай, экстремал алпинистлар ушбу тоғга тез-тез чиқиб туради. Тепаликка кўтарилиш, албатта, кўп калорияларни йўқотишга ва чарчоққа олиб келади. Бу эса вулқон ёнида ресторан бизнеси бошлаш учун ажойиб имкониятдир!
Шундай фикрга гватемалалик ошпаз Марио Давид Гарсия келди ва вулқоннинг ўзида пицца пишириш ғоясини амалга оширди. У ҳар куни махсус, оловда эримайдиган кийим-бош билан тоғга чиқади ва ўзи билан пицца учун керакли маҳсулотлар солинган 30 килограммлик рюкзакни олиб юради. Вулқон иссиғида пиширилган пиццаларни ўша ердан ўтиб кетаётган сайёҳларга сотади. У ўзининг очиқ осмон остидаги ресторанини Pizza Pacaya деб атайди.
- Дунёдаги энг катта пицца деярли 1300 квадрат метрни ташкил этади.
2012 йил декабрь ойида Римда 1261,65 квадрат метр майдонда тайёрланган пицца Гиннес рекордлари китобига киритилган эди. Ушбу пицца NIPfood ресторани бош ошпази Довилио Нарди томонидан тайёрланган. Пицца император Октавиан Август шарафига “Оттавиа” деб номланган ва 100 фоиз глютенсиз таом бўлган.
Куни кеча мазкур рекорд Airrack тахаллуси остидаги америкалик блогер ва Pizza Hut компанияси томонидан янгиланди. Улар ҳамкорликда Лос-Анжелес анжуманлар марказининг улкан залида 1299,71 квадрат метр майдонга эга пицца тайёрлади. Унга 6193 килограмм хамир, 2244 килограмм ширин соус, 3992 килограмм пишлоқ ва 630 496 дона пепперони бўлакчалари сарфланди.
ОАВга берилган тақдимотдан сўнг пицца бўлакларга бўлиниб, Лос-Анжелесдаги хайрия ташкилотларига юборилди.
- Пицца авваллари камбағал кишилар таоми бўлган.
Фото: Wikimedia Commons
Хамир устига турли маҳсулотлар қўйиб пишириш қадимдан мавжуд. Бундай таомларнинг кўплаб мисоллари бор: Хитойча бинг, Жанубий Осиёнинг наан таоми, французча киш ва африкача инжера кабилар шулар жумласидан. Уларнинг умумий жиҳати шундаки, хамирли таом учун идиш талаб этилмас ва уни қўлда ейиш мумкин бўлган.
Бугунги замонавий пиццалар Неаполда 16–17-асрларда вужудга келган. Пиццага аввал Америкадан испанлар олиб келган помидорлар қўшилган. Бундай таом кам таъминланганлар учун кўча таомлари ҳисобланган.
- Бруклинда пиццали қутида пицца сотилади
Шон Бертем ўзи туғилиб ўсган Нью-Йоркнинг Бруклин районида сайр қилиб юрган эди ва кўчада пиццадан қолган кўплаб қутиларга кўзи тушди. Шунда унга ажойиб фикр келди ва Шон ўзининг Vinnie’s Pizzeria тармоғини очди. Ушбу кафеда пиццалар ейиш мумкин бўлган пиццали қутиларда сотилади. Устидан эса фольга қоғози билан ўралади.
- Баъзан пиццага ноодатий маҳсулотлар, масалан, олтин қўшиб пиширишади.
Пиццага қўшиладиган ананас бўлаклари ҳозирда ҳеч кимни ҳайратда қолдирмайди. Лекин Европада ушбу таомга ўзгача маҳсултолар қўшиб тайёрлаш одати мавжуд. Масалан, Швецияда машҳур бўлган Pizza Africana’га банан, пиёз, ерёнғоқ ва товуқ гўшти қўшилади. Товуқ ўрнига Африкага хос экзотик гўшт, масалан, туяқуш гўшти бўлаклари солиниши мумкин.
Шунингдек, Глазгоуда бир дона пицца 4200 долларга сотилган. Pizza Royale 007 номли таом Дом Перигнон шампан виносига ботирилган қора икра, 100 йиллик конякда маринадланган кийик гўшти, шотландча дудланган лосось балиғи, юқори сифатли прошутто ва балзамик циркадан иборат. Бундай пиццанинг устига сусаль олтини сепилади ва дастурхонга тортилади.
Изоҳ (0)