Суриялик қочқин Германиядаги шаҳарлардан бирининг мэри этиб сайланди. У овозлар сони бўйича икки маҳаллий номзодни ортда қолдирди

Германиянинг Баден-Вюртемберг штатидаги Остелсхайм шаҳри аҳолиси суриялик қочқин Райан Алшеблни мэр этиб сайлади, деб хабар бермоқда DPA. Агентлик маълумотларига кўра, Алшебл Германия жануби-ғарбидаги шаҳарда келиб чиқиши суриялик бўлган биринчи мэрга айланди.

DPA нашрининг ёзишича, 29 ёшли Алшебл 2015 йилда армияга мажбурий чақириладиган пайтда ўзи туғилиб ўсган Эс Сувайда шаҳрини тарк этади. У дастлаб Ливан орқали Туркияга қочиб кетади, шундан сўнг бошқа муҳожирлар билан бирга Грециянинг Лесвос оролига кўчиб ўтади.

Германияга келгач, Алшебл Калв шаҳрига жойлашади, у ерда бир ярим йил турли хонадонларда яшайди ва немис тилини ўрганади. Кейин у Алтенгштетт коммунасига кўчиб ўтади. У ерда Алшебл маҳаллий маъмуриятда амалиёт ўтаб, сўнг шаҳар мэриясига ишга киради ва етти йил давомида ишлайди.

2023 йилда Алшебл қўшни Остелсхайм мэри лавозимига даъвогарлик қилди ҳамда икки маҳаллий номзод Марко Штраус ва Матиас Фейдан кўпроқ овоз олди. DPA маълумотларига кўра, Алшебл сайловда 55,41 фоиз овоз билан ғалаба қозонган.

Сайловолди ташвиқоти доирасида янги мер асосий эътиборни шаҳар инфратузилмасини, шаҳар марказини, болалар боғчаларини ва кексалар учун кундузги парвариш дастурини ривожлантиришга қаратишга ваъда берган. Бундан ташқари, Алшебл атроф-муҳитни муҳофаза қилишга катта аҳамият бермоқчи ва хусусий уйларда қуёш панелларини ўрнатиш дастурини кенгайтирмоқчи.

Алшеблни Остелсхайм аҳолисининг кўпчилиги, шу жумладан, собиқ мэр Юрген Фукс қўллаб-қувватлаганига қарамай, қатъий қаршилик кўрсатганлар ҳам бўлди, деб таъкидлайди DPA. Аввало, Алшеблнинг келиб чиқиши рақибларини қониқтирмаяпти. Шу билан бирга, Алшеблнинг ўзи бундай муносабатга тушунмаяпти, чунки у ўзининг асли суриялик экани сайловчилар учун бирор маънога эга бўлишига ишонмайди. Айниқса, унинг Германияга анча олдин кўчиб келгани, маҳаллий жамиятга сингиб кетгани ва фуқароликни олгани ҳисобга олинса.

DPA маълумотларига кўра, Алшебл июнь ойида мэр лавозимига киришади. Бу вақтга келиб, у Алтенгштетт шаҳар ҳокимиятидаги ишини тугатиб, Остелсхаймда квартира излашни режалаштирмоқда. “Бу сайлов, эҳтимол, ҳаётимдаги энг муҳим лаҳза бўлди”, — дейди Алшеблнинг ўзи.

2011 йилда Сурияда фуқаролар уруши бошланган, бунинг оқибатида юз минглаб Сурия фуқаролари Европага қочиб кетган. Бу, ўз навбатида, 2015—2017 йилларда мигрантлар инқирозига олиб келди. Масалан, 2015 йилда Европа Иттифоқида бошпана сўраб мурожаат қилганлар сони икки бараварга ошиб, 1,3 миллион кишига етган. Европа чегараларини ноқонуний кесиб ўтганлар сони ҳам бир неча баравар ортган. Шу билан бирга, Германия ҳукумати 2015—2016 йиллар давомида 1,2 миллионга яқин бошпана сўровини рўйхатга олган.