WBC Теренс Кроуфордни ярим ўрта вазндаги камаридан маҳрум қилди ва “таътилдаги чемпион” деб эълон қилди

Бутунжаҳон бокс кенгаши (WBC) Теренс Кроуфордни “таътилдаги чемпион” деб эълон қилди.

Кроуфорд 2023 йил июль ойида Эррол Спенсни техник нокаутга учратгандан буён ярим ўрта вазн тоифасида мутлақ жаҳон чемпиони бўлиб турганди. Шундан буён у рингга кўтарилмади.

Ўтган йилнинг кузида ундан IBF титули олиб қўйилганди.

Эслатиб ўтамиз, 3 август куни Теренс супер ярим ўрта вазн тоифасида WBA камари соҳиби, ўзбекистонлик Исроил Мадримовга қарши жанг қилади. Улар ўртасидаги қарама-қаршилик Лос-Анжелесда бўлиб ўтади. 

Америкалик боксчи профессионал рингда ўтказган 40 та жангининг барчасида ғалаба қозонган. Ғалабаларининг 31 тасига нокаут орқали эришган.

Мадримов эса 8 март оқшомида Саудия Арабистонининг Ар-Риёд шаҳрида россиялик Магомед Курбановни 5-раундда нокаутга учратиб, WBA камарини қўлга киритганди.