Бокс бўйича оғир вазн тоифасида собиқ жаҳон чемпиони Майк Тайсон Майамидан Лос-Анжелесга учаётган вақтида тиббий хизмат ходимларига мурожаат қилди. Бу ҳақда NY Post нашри хабар бермоқда.
Манбага кўра, қўнишга 30 дақиқа қолганда спортчи ошқозон ярасининг очилиб кетиши оқибатида боши айланган ва ўзини жуда нохуш ҳис қилган. Тайсоннинг жамоаси боксчи ҳозирда ўзини яхши ҳис қилаётганини маълум қилди.
“Тайсон ўзини яхши ҳис қиляпти. У ўз вақтида ёрдам кўрсатган тиббиёт ходимларидан миннатдор”, — дейилади баёнотда.
7 март куни Тайсон блогер Жейк Полга қарши жанг ўтказиши маълум бўлди. Жанг 20 июль куни АҚШнинг Арлингтон шаҳридаги А&Т аренасида бўлиб ўтади.
Тайсон ўз фаолиятини 2005 йилда якунлаган. 1987 йилдан 1990 йилгача у оғир вазн тоифасида мутлақ жаҳон чемпиони бўлган. Тайсон 58 та жанг ўтказиб, 50 тасида ғалаба қозонган (44 таси нокаут билан) ва 6 тасида мағлубият аламини тотиб кўрган. Унинг иштирокидаги яна иккита жанг ўтказилмаган деб топилган.
Изоҳ (0)