Исроил кучлари Рафаҳдаги қочқинлар яшайдиган Тал-ас-Султон лагерини бомбардимон қилди, 40 га яқин одам ҳалок бўлди. Бу ҳақда Al Jazeera хабар берди.
Таъкидланишича, қурбонларнинг аксарияти аёллар ва болалар бўлган. Фаластин Қизил ярим ой жамияти чодирлардаги кўплаб одамлар тириклаб ёниб кетганини таъкидлаган.
“Ҳудуддаги шифохоналар Исроил ишғолининг Ғазо секторидаги соғлиқни сақлаш тизимини атайлаб йўқ қилиши натижасида бундай кўп сонли жароҳатланганлари сиғдира олмаяпти”, — дейилади баёнотда.
Маҳаллий манбалар камида саккизта ракета БМТнинг фаластинлик қочқинларга ёрдам кўрсатувчи агентлиги (UNRWA) омбори ёнида яқинда ўрнатилган чодир лагерига урилганини айтди.
“Гарчи Исроил хавфсиз ҳудуд деб белгилаб, фуқароларни у ерга кўчиришга мажбур қилган бўлса ҳам, бизга фавқулодда қўнғироқ келди. Ҳудуддаги ёнғинни ўчиришга тахминан 45 дақиқа вақт керак бўлди, бир қанча жасадлар ва жароҳатланганларни олиб чиқдик. Жасадларнинг аксарияти куйиб кетган ва ёниб кетган.
Потенциал халқаро миқёсда тақиқланган қуролларни қўллаш йирик ёнғин келиб чиқишига сабаб бўлган, оқибатида жабрланганлар оёқ-қўлларини йўқотган ва бошқа жароҳатлар олган. Биз 50 га яқин одамни ва ярадорларни ҳудуддан олиб чиқиб, дала касалхоналарига етказдик”, — дея таъкидлади Ғазо фуқаролик мудофааси гуруҳларини бошқарадиган доктор Муҳаммад ал-Муғаййир
Исроил армияси ўз баёнотида ҲАМАС лагерига ҳаво ҳужуми уюштирилганини даъво қилди. Ҳарбийлар тинч аҳоли жароҳатланганидан хабардор эканини маълум қилди.
“Зарба халқаро қонунларга мувофиқ, аниқ ўқ-дорилардан фойдаланган ҳолда ва ҲАМАС ҳудуддан фойдаланаётганини кўрсатувчи аниқ разведка маълумотларига асосланиб, қонуний нишонларга қарши амалга оширилди”, — дея қўшимча қилди Исроил армияси.
Эслатиб ўтамиз, 26 май куни ҲАМАС тинч аҳоли ўлдирилишига жавобан январь ойидан буён биринчи марта Исроилнинг марказий районларига ракеталар учирди. Исроил армияси уларнинг аксарияти тутиб олинганини маълум қилди.
Изоҳ (0)