Litvaning amaldagi prezidenti Gitanas Nauseda prezidentlik saylovlarining ikkinchi bosqichida g‘alaba qozondi. Bosh saylov komissiyasining dastlabki ma’lumotlariga ko‘ra, Nausedaga saylovchilarning 75 foizdan ortig‘i ovoz bergan.
Saylovdagi ikkinchi nomzod, bosh vazir Ingrida Shimonite esa 22 foiz ovoz to‘plagan.
“Men farovon davlatni yanada tatbiq etish haqida jiddiy o‘ylayapman”, — dedi Gitanas Nauseda.
Bundan besh yil avval bo‘lib o‘tgan prezidentlik saylovida u o‘z siyosatining asosiy yo‘nalishi sifatida farovon davlat yaratishni tanlagandi. Shuningdek, Litvaning hozirgi tashqi siyosatini davom ettirishga va’da bergan. Nauseda Litva Yevropa Ittifoqi va NATO bilan hamkorlikdan yanada ko‘proq foyda olishiga umid bildirmoqda.
Bu Gitanas Nauseda uchun ikkinchi va oxirgi prezidentlik muddati bo‘ladi. Litva konstitutsiyasiga ko‘ra, prezident ketma-ket ikki martadan ortiq saylanishi mumkin emas.
Gitanas Nauseda iqtisodchi bo‘lib, Vilnyus universitetida tahsil olgan. Shuningdek, u ijtimoiy fanlar doktori darajasiga ega. Iqtisodiyot va xususiylashtirish institutida, Narxlar va raqobat davlat xizmatida, Litva bankida ishlagan. Vilnyus universitetida qariyb 30 yil dars bergan, 18 yil xususiy bankda faoliyat yuritgan.
Saylovda nomzodini qo‘ygan bosh vazir Ingrida Shimonite allaqachon Gitanas Nausedani g‘alabasi bilan tabriklagan. Saylovning birinchi bosqichida Shimonite 33 foiz ovoz olgandi. Siyosatchilarning har ikkisi Ukrainani qo‘llab-quvvatlaydi va Rossiyani tanqid qiladi.
Izoh (0)