Зеленский унинг президентлик муддати ҳали тугамаганини айтиб ўтди

Украина президенти Владимир Зеленскийнинг фикрича, унинг давлат раҳбари сифатидаги ваколат муддати ҳали тугамаган.

Бу ҳақда Зеленский Reuters агентлигига берган интервьюсида маълум қилди.

“Беш йиллик муддатим ҳали тугамади, чунки ҳарбий ҳолат давом этмоқда”, — деди Зеленский.

Шунингдек, у президент сифатидаги ўз фаолиятини баҳолай олмаслигини қўшимча қилди. “Чунки бу этика жиҳатидан тўғри эмас”, — деди Украина президенти.

Владимир Зеленский 2019 йил апрель ойида Украина президенти этиб сайланганди. У сайловда жами 73,22 фоиз овоз олган.

Аввалроқ Украина президенти Ғарб иттифоқчиларининг Киевга ҳарбий ёрдам бўйича қарор қабул қилиши чўзилаётганидан шикоят қилганди.

Унинг сўзларига кўра, айни дамда Киев Россияга ҳавода қарши туриш учун зудлик билан камида 120-130 та ҳарбий техникага муҳтож.