Исроил Ғазо жанубидаги Рафаҳ ҳудудига қўшимча кучлар юборади. Бу ҳақда Исроил мудофаа вазири Йоав Галлант баёнотига асосланиб, “ТАСС” нашри хабар берди.
Манбада айтилишича, қўшимча куч юборишдан асосий мақсад операцияни тезроқ якунлаш. Бунга эришиш учун эса Исроил Ғазо шимолидаги ҳарбий қисмларини Рафаҳга кўчиради.
Йоав Галлант мавжуд вазиятни баҳолаш учун 15 май куни Рафаҳ яқинидаги ҳудудга борган. Ҳудудда Исроил ҳарбийлари билан учрашган.
“Рафаҳдаги қуруқлик операцияси ҳудудига қўшимча кучлар юборилади. Ушбу ҳудуддаги бир қанча туннеллар вайрон қилинган”, — деган мудофаа вазири ҳарбийлар билан учрашувда.
Йоав Галлант ,шунингдек, Исроил кучлари Ғазо жанубида муваффақиятли иш олиб бораётганини айтган. Ҳудуд тўла аскарлар назоратида экани билдирилган.
“Мен Рафаҳ ҳудудидаман. Қўшинларимиз аъло даражада вазифа бажаряпти. Юзлаб нуқталар аллақачон нишонга олинган. Бўлинмаларимиз ҳудудда манёврлар амалга оширмоқда”, — деган Исроил вазири.
Мудофаа вазири Йоав Галлант Исроил ҳужуми якунланганидан сўнг ҲАМАСни қайта тиклаш мутлақо имконсиз эканини айтган. Чунки бу ҳаракатнинг захира қўшинлари, ресурс манбалари ҳамда таъминот омборлари тўлалигича вайрон қилинган.
Изоҳ (0)