Тунис соҳилидан 18 май куни Италия томон қайиқда сузиб кетган 23 нафар муҳожир Ўрта Ер денгизида бедарак йўқолди. Бу ҳақда Тунис миллий гвардияси берган маълумотга асосланиб, Reuters нашри хабар берди.
Манбада айтилишича, ноқонуний муҳожирлар Италия жанубига боришни режалаштириб йўлга чиққан. Саёҳат бошланганидан бир неча соат ўтгач қайиқ изсиз йўқолгани маълум қилинган.
Шимолий Африкада жойлашган Тунис миграция инқирозини бошдан кечирмоқда. Мамлакат фуқаролари Европада яхшироқ ҳаёт кечириш умидида тобора кўпроқ Ўрта Ер денгизини кечиб ўтишмоқда.
Тунис миллий гвардияси денгиз-қутқарув гуруҳлари қайиқ ва ундаги муҳожирларни излаш билан шуғулланаётгани маълум қилинган. Ўрта Ер денгизи бўйидаги мамлакатлардан муҳожирлар аниқланган тақдирда хабар бериш сўралган.
Европа томон ҳаракатланадиган ноқонуний муҳожирларнинг катта қисми Тунис ва унга қўшни Ливия ҳудудларидан жўнаб кетади. Ушу мамлакатлардаги ишлаб чиқаришнинг пастлиги ва фуқаровий беқарорлик миграция юзага келиши учун асосий омил сифатида кўрилади.
Изоҳ (0)