Швецияда 16 март куни фуқаролар мамлакат раҳбариятининг Исроилни қўллаб-қувватлашига қарши намойиш ўтказган. Бу ҳақда Ғарб манбаларига таяниб, Anadolu нашри хабар берди.
Манбада айтилишича, Швеция парламенти биноси олдида пайшанба куни Фаластин байроқларини кўтариб олган фуқаролар тўпланган. Улар ҳукумат вакилларидан Исроил билан алоқаларини тугатишни талаб қилишган.
Фуқаролар намойишига яҳудий миллатига мансуб Швеция фуқароси Дрор Фейлер бошчилик қилган. У Исроил раҳбариятини жазога тортишга чақирган.
“Исроил ҳукумати аъзолари ўз ҳаётларини Слободан Милошевич ва Радован Каражич сақланган қамоқхонада тугатишлари керак”, — деган швециялик яҳудий фаоли Дрор Фейлер.
Намойишчилар “Ғазодаги геноцидга чек қўйинг”, “Йўқолсин оккупация” ва “Озод Фаластин” деб ёзилган баннерлар кўтариб олишган. Ҳукуматдан ўз талабларини бажаришни қатъий талаб қилишган.
Швеция ҳукумати ҳозирча намойишчилар талаблари борасида муносабат билдирмаган. Уларга қарши полиция ёрдамидан фойдаланилгани борасида ҳам хабарлар йўқ.
Изоҳ (0)