Исроилнинг Ғазо секторига сўнгги 24 соатда амалга оширган ҳужумлари оқибатида камида 39 нафар фаластинлик ҳалок бўлган. Бу ҳақда Al Jazeera нашри хабар берди.
Манбада айтилишича, энг фаол ҳужумлар Жабалия аҳоли пуктида амалга оширилган. Исроил ҳаво кучлари шаҳарчанинг турли қисмларини ўққа тутган.
Расмийлар ўнлаб фуқаролар вайрон бўлган бинолар остида қолиб кетганини билдирган. Ҳудудда қутқарув гуруҳлари бўлмагани боис оддий аҳоли вакиллари бино остида қолганларни қутқариш учун кўнгиллилардан иборат гуруҳлар ташкил этган.
Ғазо шимолидаги Жабалия ҳудудида энг йирик муҳожирлар лагерларидан бири жойлашгани хабар қилинган. Лагер БМТ томонидан 1948 йилда ташкил қилинган.
Жабалиядаги лагер 1948 йилда Фаластин ҳудудида юз берган этник қирғин оқибатида қочқинга айланган тинч аҳоли вакилларига бошпана бериш учун ташкил қилинган. У ҳозирда ҳам Ғазо секторидаги энг йирик лагерлар қаторида бўлиб, лагер ҳудудида камида 26 та мактаб жойлашган.
Al Jazeera нашри Исроил кучлари Хон Юнис шаҳрига ҳам зарба берганини ёзган. Ушбу шаҳар Ғазо сектори жанубида бўлиб, сўнгги 3 ой давомида Тель-Авив аскарларининг нишонига айланган эди.
Хон Юнисдаги турар жой биноларига ҳужум оқибатида камида 5 киши ҳалок бўлгани айтилган. Фаластиннинг WAFA нашри ҳам бу маълумотни тасдиқлаган.
Аввалроқ Исроил ҳужумлари натижасида Рафаҳдан қочаётган тинч аҳоли вакиллари шимоли-шарқдаги Хон Юнис шаҳри томонга бошпана излаб кетаётгани хабар қилинган эди.
Изоҳ (0)