“Зино биринчи навбатда фарзандга уради”. Али Отажонов ножўя таклифлар, саратондан тузалгани ҳамда фарзандсизлик синовига учрагани ҳақида гапирди

Хонанда ва актёр Али Отажонов “Chotki TV” YouTube каналига берган интервьюсида йиллар давомида мухлисаларидан ножўя таклифлар келиши, бир неча йил аввал саратонни бошдан кечиргани ҳақида сўзлаб берди.


— Менга қизлардан жуда кўп SMS’лар келади. Йиллар давомида, ҳатто пул тўламоқчи бўлган аёллардан хабарлар келади. Ўйламай ҳам блокка тиқаман. Буни битта сабаби: қизим бор. Зино биринчи навбатда фарзандга ураркан. Мени ақлли экан, деб ўйлашингизни ҳам истамайман, саволга ақлим етганича жавоб беряпман, — дейди хонанда. 

Али Отажонов илк марта тақдирнинг мураккаб синовларини бошдан кечиргани ҳақида сўзлаб берди.

— 2014 йилда ҳаёт менга катта синов берди. Ўшанда романтик Али Отажонов реалист Али Отажоновга айланиб қолди. Саратон касалига чалиндим. Бу касалликни касал бўлган инсон билади. Ўлишингни кутиб ётасан, бугун ухлайман, эртага кўзимни очмаслигим мумкин, деб ётасан. Биринчи турмушимдан ажрашганман, ҳозирги аёлимга ҳали уйланмагандим, лекин муносабатимиз бор эди. Шундай қийин вазиятда бу аёлим ажрашган, саратон касаллигига чалинган бир йигитнинг олдида турди. Германияга бордим, муолажалар олдим, даволандим, Аллоҳга шукур.
Бундан кейин эса фарзанд кўришим жуда қийин бўлди. 5 йил бефарзанд бўлдик, шу йиллар ичида 4 марта ЭКО қилдирдик. Ҳаттоки, яқинларимиз “Ажраша қолинглар” деган пайтлар ҳам бўлди. Охирги марта ЭКО қилдиришга Туркияга кетаётганимизда “Берса бахтимиз, бермаса синовимиз, лекин ажрашиш йўқ”, деган қарорга келдик. Ўшанда менда умид йўқ эди, лекин аёлим фарзандли бўлишимизга жуда қаттиқ ишонарди.

Шу орада бувам, бувим вафот этди. Бу ёқда бефарзандлик. Мен ҳар томонлама синиб бўлган эдим. Хуллас шундай кунлардан бирида аёлим фарзандли бўлишимизни айтиб қолди. Энди у онларнинг нақадар катта бахт эканлигини сизга тасвирлаб бера олмайман. Фарзандли бўлмаслигига кўнган одамга “ота бўласиз” дейишса, бу жуда ҳам бошқача туйғу. Мен бу гапларим билан ҳаммага ноумид бўлмаслик кераклигини айтмоқчиман. Ҳозирда қиз фарзандим бор. Дунё бир тараф— қизим бир тараф. Исми Марям.   
Ҳозир ажримлар кўпайиб кетган. Қиз туғса, ўғил туғмадинг, деб ажрашиб кетаётганлар ҳам бор. Ҳеч қачон ажрашиш керак эмас. Имкон қадар оилани асраш керак. Чунки ажрашган эркак киши синиб қоларкан. Ўзимнинг бошимдан ўтган, — дейди хонанда.