“Zino birinchi navbatda farzandga uradi”. Ali Otajonov nojo‘ya takliflar, saratondan tuzalgani hamda farzandsizlik sinoviga uchragani haqida gapirdi

Xonanda va aktyor Ali Otajonov “Chotki TV” YouTube kanaliga bergan intervyusida yillar davomida muxlisalaridan nojo‘ya takliflar kelishi, bir necha yil avval saratonni boshdan kechirgani haqida so‘zlab berdi.


— Menga qizlardan juda ko‘p SMS’lar keladi. Yillar davomida, hatto pul to‘lamoqchi bo‘lgan ayollardan xabarlar keladi. O‘ylamay ham blokka tiqaman. Buni bitta sababi: qizim bor. Zino birinchi navbatda farzandga urarkan. Meni aqlli ekan, deb o‘ylashingizni ham istamayman, savolga aqlim yetganicha javob beryapman, — deydi xonanda. 

Ali Otajonov ilk marta taqdirning murakkab sinovlarini boshdan kechirgani haqida so‘zlab berdi.

— 2014-yilda hayot menga katta sinov berdi. O‘shanda romantik Ali Otajonov realist Ali Otajonovga aylanib qoldi. Saraton kasaliga chalindim. Bu kasallikni kasal bo‘lgan inson biladi. O‘lishingni kutib yotasan, bugun uxlayman, ertaga ko‘zimni ochmasligim mumkin, deb yotasan. Birinchi turmushimdan ajrashganman, hozirgi ayolimga hali uylanmagandim, lekin munosabatimiz bor edi. Shunday qiyin vaziyatda bu ayolim ajrashgan, saraton kasalligiga chalingan bir yigitning oldida turdi. Germaniyaga bordim, muolajalar oldim, davolandim, Allohga shukur.
Bundan keyin esa farzand ko‘rishim juda qiyin bo‘ldi. 5 yil befarzand bo‘ldik, shu yillar ichida 4 marta EKO qildirdik. Hattoki, yaqinlarimiz “Ajrasha qolinglar” degan paytlar ham bo‘ldi. Oxirgi marta EKO qildirishga Turkiyaga ketayotganimizda “Bersa baxtimiz, bermasa sinovimiz, lekin ajrashish yo‘q”, degan qarorga keldik. O‘shanda menda umid yo‘q edi, lekin ayolim farzandli bo‘lishimizga juda qattiq ishonardi.

Shu orada buvam, buvim vafot etdi. Bu yoqda befarzandlik. Men har tomonlama sinib bo‘lgan edim. Xullas shunday kunlardan birida ayolim farzandli bo‘lishimizni aytib qoldi. Endi u onlarning naqadar katta baxt ekanligini sizga tasvirlab bera olmayman. Farzandli bo‘lmasligiga ko‘ngan odamga “ota bo‘lasiz” deyishsa, bu juda ham boshqacha tuyg‘u. Men bu gaplarim bilan hammaga noumid bo‘lmaslik kerakligini aytmoqchiman. Hozirda qiz farzandim bor. Dunyo bir taraf— qizim bir taraf. Ismi Maryam.   
Hozir ajrimlar ko‘payib ketgan. Qiz tug‘sa, o‘g‘il tug‘mading, deb ajrashib ketayotganlar ham bor. Hech qachon ajrashish kerak emas. Imkon qadar oilani asrash kerak. Chunki ajrashgan erkak kishi sinib qolarkan. O‘zimning boshimdan o‘tgan, — deydi xonanda.