Хоразм, Самарқанд ва Фарғона вилоятларида электр тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Гурлан туман бўлими томонидан ЭТК ходимлари билан ҳамкорликда терговга қадар текширув ўтказилган. Текширувда тумандаги “О.Д.” фермер хўжалиги масъул шахслари иккита сув насосини тижорат мақсадида ҳисоблагичдан ташқари электр тармоғига улаб, жами 233,5 миллион сўмлик электр энергиясидан ноқонуний фойдалангани аниқланган.
Худди шундай, департаментнинг Ўзбекистон туман бўлими томонидан ўтказилган терговга қадар текширувда “З.П.” фермер хўжалиги раҳбари А.Х. хўжаликнинг дала майдонидаги сув насосини электр тармоғига тўғридан тўғри улаб, жами 143,2 миллион сўмлик электр энергиясидан ноқонуний фойдалангани маълум бўлган.
Департаментнинг Жомбой туман бўлими томонидан ўтказилган терговга қадар текширувда эса “Ж.а.” оилавий корхонаси раҳбари ишлаб чиқариш цехи биносидаги ускуналарни электр тармоғига тўғридан тўғри яширинча улаб, жами 136,4 миллион сўмлик электр энергиясидан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ пойтахтда электр энергиясига ноқонуний уланиб, давлат манфаатларига 1,5 миллиард сўмлик зарар етказган майнинг ферма аниқлангани тўғрисида хабар берилганди. Шунингдек, Жиззахда иккита майнинг ферма давлатга салкам ярим миллиард сўм зарар етказгани маълум бўлган, Тошкент вилоятида 733 млн сўмлик электр энергиясидан ноқонуний фойдаланган майнинг ферма аниқланган эди.
Изоҳ (0)