Тошкент шаҳрида тўй куни ҳуқуқбузарлик содир этган келин ва куёв жавобгарликка тортилди. Бу ҳақда пойтахт Йўл ҳаракати хавфсизлиги бошқармаси хабар берди.
Қайд этилишича, 25 апрель куни соат 22:30 ларда “Бектемир” тўйхонасидан Mercedes-Benz транспорт воситасида уйга қайтаётган келин ҳаракатланаётган машинанинг люкидан, куёв эса орқа чап ойнасидан танасини чиқариб, қоидабузарлик содир этган.
Содир бўлган ҳолат юзасидан Тошкент шаҳар ИИББ ЙҲХБ томонидан Маъмурий жавобгарлик тўғрисидаги кодекснинг 138-модда (пиёдалар ва йўл ҳаракати бошқа иштирокчиларининг йўл ҳаракати қоидаларини бузиши) билан тегишли ҳужжатлар расмийлаштирилган.
Шунингдек, ҳайдовчининг автомашинани бошқариш учун тегишли ҳужжатлари бўлмагани сабабли унга нисбатан Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) билан маъмурий баённома расмийлаштирилган ва транспорт воситаси жарима майдонига қўйилган.
Бундан олдин Қорақалпоғистондаги тўйда танасини машинадан чиқариб тасвирга олган операторлар ва ҳайдовчи жаримага тортилган эди. Шунингдек, Андижонда 20 ёшли қиз машинадан танасини чиқариб ҳаракатлангани, Самарқандда ҳаракатланаётган Gentraъдан танасини чиқариб, сохта доллар сочган йигитларга чора кўрилгани тўғрисида хабар берилганди.
Изоҳ (0)