Россия президенти Владимир Путин Хавфсизлик кенгаши котиби лавозимидан олинган Николай Патрушевни ўзининг ёрдамчиси этиб тайинлади. Бу ҳақда Кремль сайтида хабар берилди.
Патрушев 2008 йилдан буён Россия Хавфсизлик кенгаши котиби сифатида фаолият юритиб келган. У 11 май куни лавозимидан олинган. Унинг ўрнига Россия мудофаа вазири Сергей Шойгу бу лавозимни эгаллаган. Ўз навбатида, Россиянинг янги мудофаа вазири этиб аввал бош вазирнинг биринчи ўринбосари лавозимида ишлаб келган Андрей Белоусов тайинланиши кутилмоқда.
Таъкидланишича, Россия президенти Тула вилояти губернатори Алексей Дюминни ҳам лавозимидан олиб, ўзининг ёрдамчиси этиб тайинлаган.
7 май куни Путин инаугурацияси бўлиб ўтди. Бу унинг бешинчи президентлик муддати. Қонунга мувофиқ, инаугурация куни Михаил Мишустин бошчилигидаги ҳукумат истеъфога чиқди. Россия президенти Давлат думасига бош вазир лавозимига яна Михаил Мишустин номзодини тақдим этди. Мишустин Путин таклифи билан 2020 йил январида аввалги бош вазир Дмитрий Медведевнинг истеъфога чиқиши сабабли бош вазир этиб тайинланганди.
Изоҳ (0)