Rossiya bosh vaziri Mixail Mishustin 7-may kuni hukumat iste’fosi to‘g‘risidagi farmonni imzoladi. Bu haqda Vazirlar Mahkamasining Telegram kanalida xabar berildi.
Mishustin bosh vazir lavozimida to‘rt yildan sal ko‘proq vaqt ishlagan, uning boshchiligidagi hukumat konstitutsiyaga muvofiq iste’foga chiqdi. Hukumat a’zolari yangi Vazirlar Mahkamasi shakllanguncha o‘z vazifalarini bajaradi. Bosh vazirni tayinlash may oyida bo‘lib o‘tadi.
“Bosh vazir nomzodi davlat Dumasining 10-may kuni bo‘lib o‘tadigan yalpi majlisida ma’qullanadi”, — deb xabar berdi deputat Aleksandr Majuga.
2018-yilda bosh vazirlikka nomzod — Dmitriy Medvedev nomi inauguratsiyadan bir soat o‘tib prezident Vladimir Putin tomonidan aytilgandi. Yangi hukumat 13–19-may kunlari bo‘lib o‘tadigan yalpi majlisda tasdiqlanishi rejalashtirilgan. Undan oldin Duma qo‘mitalarida nomzodlar bilan uchrashuvlar o‘tkaziladi.
“20-maygacha hammasi shakllangan bo‘lishi kerak”, — deydi Kommunistik partiya rahbari Gennadiy Zyuganov.
Vazirlar Mahkamasi iste’foga chiqqanidan so‘ng sobiq bosh vazir, uning o‘rinbosarlari va vazifasini bajaruvchi sifatida faoliyatini davom ettiradi. Vazirlar Mahkamasi yangi hukumat tasdiqlanguncha shu formatda ishlaydi. Bundan tashqari, prezident administratsiyasi rahbariyatining vakolatlari avtomatik tarzda tugaydi.
Izoh (0)