Россия Мудофаа вазирлигининг кадрлар бош бошқармаси бошлиғи, генерал-лейтенант Юрий Кузнецов қўлга олинди. Бу ҳақда ҳуқуқ-тартибот идораларига таяниб, “ТАСС” хабар берди.
Кузнецов Россия Тергов қўмитасининг Бош ҳарбий тергов бошқармаси томонидан тергов қилинмоқда, у жиноий иш бўйича гумонланувчи ҳисобланади. Терговчилар генералга нисбатан қамоққа олиш тарзидаги эҳтиёт чорасини сўраган.
Кузнецов айнан нимада айбланаётганига аниқлик киритилмаган. Унинг ҳибсга олингани ҳали расман эълон қилинмаган. Суд Кузнецовга нисбатан қандай эҳтиёт чораси қўллагани ҳам номаълум.
Эслатиб ўтамиз, 23 апрель куни Россия мудофаа вазири ўринбосари Тимур Иванов ҳибсга олинганди. Тергов қўмитаси маълумотларига кўра, мансабдор шахс йирик миқдорда пора олиш мақсадида учинчи шахслар билан тил бириктирган. Ивановнинг адвокати айбланувчи 1 миллиард 125 миллион рубль (тахминан 12 миллион 285 минг доллар) пора олганликда айбланаётгани, Мудофаа вазири ўринбосарининг қариндошлари ва ота-онасининг мол-мулки хатловга олинганини айтган.
Маълумот ўрнида, Россия президенти Владимир Путин мудофаа вазирини ўзгартирмоқда. 11 май куни Путин амалдаги мудофаа вазири Сергей Шойгуни ишдан олди ва Россия Хавфсизлик кенгаши котиби этиб тайинланди. Унинг ўрнини иқтисодчи Андрей Белоусов эгаллаши кутилмоқда.
Андрей Белоусов 1959 йил 17 мартда туғилган, 1981 йилда Москва давлат университетининг иқтисод факультетини имтиёзли диплом билан тамомлаган. У сўнгги 12 йил давомида иқтисодиёт вазири, президент ёрдамчиси ва Бош вазирнинг биринчи ўринбосари лавозимларида ишлаган.
Изоҳ (0)