Европа Иттифоқи кенгаши фермерларнинг норозиликлари ортидан Ягона қишлоқ хўжалиги сиёсатини ислоҳ қилишни маъқуллади. Бу ҳақда кенгаш баёнотида айтилади.
“Европа Иттифоқи кенгаши умумий қишлоқ хўжалиги сиёсатини қисман мақсадли кўриб чиқишни расман тасдиқлади. Ушбу кўриб чиқиш фермерлар томонидан сўнгги ойларда билдирилган хавотирларга жавобдир”, — дейилади хабарда. Ҳужжатни ислоҳ қилиш зарурати Украинадаги ҳарбий можаро оқибатлари ва иқлим ўзгариши билан боғлиқ.
Ислоҳотлар Европа фермерларининг ҳаётини осонлаштириши кутилмоқда.
“Янгиланган қоидалар тартиб-таомилларни соддалаштиради, маъмурий юкни камайтиради, атроф-муҳитни муҳофаза қилишнинг муайян стандартларига риоя қилишни юмшатади ва фермерлар учун олдиндан тахмин қилинадиган шарт-шароитларни кафолатлайди”, — дейилади ҳужжатда.
Йил бошидан бери Европа Иттифоқининг айрим давлатларида фермерлар томонидан қишлоқ хўжалиги сиёсатига ўзгартиришлар киритиш, хусусан, кўплаб чекловларни олиб ташлаш ва назоратсиз арзон импорт, жумладан, Украина импортини тўхтатиш талаби билан оммавий норозилик намойишлари бўлиб ўтди.
Энг катта норозилик намойишлари Украина билан чегарадаги назорат-ўтказиш пунктини тўсиб қўйган полшалик фермерлар томонидан ўтказилди. Фермерлар касаба уюшмаларининг маълум қилишича, амалдаги қишлоқ хўжалиги сиёсати туфайли фермерлар деярли фойда олмай қўйишган.
Изоҳ (0)