Буюк Британия мудофаа вазири Грант Шеппс Сергей Шойгунинг Россия Мудофаа вазирлиги раҳбари лавозимига Андрей Белоусов билан алмаштирилганига кескин изоҳ берди.
Унинг фикрича, Россиянинг янги мудофаа вазири мамлакат президенти Владимир Путиннинг навбатдаги “қўғирчоғи” бўлади.
Сергей Шойгу Украинага ҳужум натижасида 355 мингдан ортиқ аскарларининг қурбон бўлишига ҳамда тинч аҳоли орасида азоб-уқубатларга гувоҳ бўлган. Россияга бу ҳалокатни тўғрилаш ва босқинни тугатиш учун мудофаа вазири керак, — дея таъкидлаган британиялик вазир.
Шунингдек, Литва президенти Гитанас Науседа ҳам Россия мудофаа вазири лавозимига Белоусовнинг тайинланиши ҳақида фикр билдирган. Унга кўра, Шойгуни алмаштириш ҳақидаги қарор Россия ичидаги аудитория учун қабул қилинган.
Буларнинг барчаси ички бозор учун, урушни давом эттириш учун қилинмоқда, келинг, Владимир Путин қандайдир тинчлик музокараларига тайёр, деган хаёлларга бормайлик, — деди Науседа.
12 май куни Россия президенти мамлакат мудофаа вазири лавозимига Андрей Белоусов номзодини илгари сургани хабар берилган эди. Сергей Шойгу эса Россия Хавфсизлик кенгаши котиби этиб тайинланган. Тегишли фармонни Владимир Путин имзолаган.
Шунингдек, Россия президенти Наришкинни Ташқи разведка хизмати директори, Бортниковни Федерал хавфсизлик хизмати бошлиғи, Золотовни Россия гвардияси бошлиғи, Кочневни эса Федерал хавфсизлик хизмати директори этиб қайта тайинлашни илгари сурган.
Путин Лавров, Колоколцев, Куренков ва Чуйченкони мос равишда Россия Ташқи ишлар вазирлиги, Ички ишлар вазирлиги, Фавқулодда вазиятлар вазирлиги ва Адлия вазирлиги раҳбарлари этиб қайта тайинлашни таклиф қилган.
Изоҳ (0)