Россия президенти Владимир Путин Хавфсизлик кенгаши раҳбари ўринбосари Дмитрий Медведевни яна бир лавозимга — Ҳарбий-саноат комиссияси раисининг биринчи ўринбосарлигига тайинлади. Путиннинг тегишли фармони ҳуқуқий ахборот расмий порталида эълон қилинди.
Шу пайтгача Ҳарбий-саноат комиссияси ҳақидаги низомга мувофиқ, ушбу тузилмада раиснинг биринчи ўринбосари лавозими кўзда тутилмаган эди. Ушбу мансабни эгаллайдиган киши комиссия мажлисларини ўтказиб, унинг ичида кенгашлар ва ишчи гуруҳларни тузиш ҳуқуқига эга, дейилади Путиннинг фармонида.
Россия армияси учун қурол-яроғ ишлаб чиқаришни мувофиқлаштирувчи Ҳарбий-саноат комиссияси раиси Путиннинг ўзидир.
Дмитрий Медведев 2008—2012 йилларда Россия президенти, 2012—2020 йилларда эса бош вазир лавозимларини эгаллаган. 2020 йил январида, бош вазирликдан истеъфога чиққач, Медведев Хавфсизлик кенгаши раиси ўринбосарига айланди. Бу лавозим у учун махсус яратилди.
Россия Украинага бостириб киргач, Медведев урушнинг энг агрессив тарафдорларидан бирига айланди ҳамда Путиннинг Ғарб ва Украинадаги сиёсий рақибларига нисбатан ҳақоратли жумлаларни қўллай бошлади. Шунингдек, Медведев Россия мудофаа корхоналарига кўп марта ташриф буюрган.
Эслатиб ўтамиз, Медведев «Российская газета»да «Бизнинг халқимиз, еримиз, ҳақиқатимиз» номли мақоласини чоп эттирди ва унда 6 банд билан 2022 йил якунларини сарҳисоб қилди. У Украинанинг амалдаги расмийлари билан тинчлик музокараларини рад этди ва давом этаётган ядровий таҳдид ҳақида гапирди. Аммо у «охирзамон ҳали келмайди», деб ишонтирди.
Изоҳ (0)