Buyuk Britaniya mudofaa vaziri Grant Shepps Sergey Shoyguning Rossiya Mudofaa vazirligi rahbari lavozimiga Andrey Belousov bilan almashtirilganiga keskin izoh berdi.
Uning fikricha, Rossiyaning yangi mudofaa vaziri mamlakat prezidenti Vladimir Putinning navbatdagi “qo‘g‘irchog‘i” bo‘ladi.
Sergey Shoygu Ukrainaga hujum natijasida 355 mingdan ortiq askarlarining qurbon bo‘lishiga hamda tinch aholi orasida azob-uqubatlarga guvoh bo‘lgan. Rossiyaga bu halokatni to‘g‘rilash va bosqinni tugatish uchun mudofaa vaziri kerak, — deya ta’kidlagan britaniyalik vazir.
Shuningdek, Litva prezidenti Gitanas Nauseda ham Rossiya mudofaa vaziri lavozimiga Belousovning tayinlanishi haqida fikr bildirgan. Unga ko‘ra, Shoyguni almashtirish haqidagi qaror Rossiya ichidagi auditoriya uchun qabul qilingan.
Bularning barchasi ichki bozor uchun, urushni davom ettirish uchun qilinmoqda, keling, Vladimir Putin qandaydir tinchlik muzokaralariga tayyor, degan xayollarga bormaylik, — dedi Nauseda.
12-may kuni Rossiya prezidenti mamlakat mudofaa vaziri lavozimiga Andrey Belousov nomzodini ilgari surgani xabar berilgan edi. Sergey Shoygu esa Rossiya Xavfsizlik kengashi kotibi etib tayinlangan. Tegishli farmonni Vladimir Putin imzolagan.
Shuningdek, Rossiya prezidenti Narishkinni Tashqi razvedka xizmati direktori, Bortnikovni Federal xavfsizlik xizmati boshlig‘i, Zolotovni Rossiya gvardiyasi boshlig‘i, Kochnevni esa Federal xavfsizlik xizmati direktori etib qayta tayinlashni ilgari surgan.
Putin Lavrov, Kolokoltsev, Kurenkov va Chuychenkoni mos ravishda Rossiya Tashqi ishlar vazirligi, Ichki ishlar vazirligi, Favqulodda vaziyatlar vazirligi va Adliya vazirligi rahbarlari etib qayta tayinlashni taklif qilgan.
Izoh (0)