Украинанинг Буюк Британиядаги элчиси Вадим Пристайко истеъфога чиқарилди. Тегишли фармон Украина президенти сайтида эълон қилинди, деб ёзмоқда Meduza.
Пристайко аввалроқ Владимир Зеленскийнинг Буюк Британия мудофаа вазири Бен Уоллесга миннатдорлик билдириш ҳақидаги сўзларини танқид қилганди, деб эслатди Украина оммавий ахборот воситалари.
11—12 июль кунлари Вильнюсда бўлиб ўтган НАТО саммити чоғида Уоллес Украина Ғарбдан олаётган ёрдами учун фаолроқ миннатдорлик билдириши кераклигини айтган. Уоллес 2022 йилда Киевга келиш учун 11 соат вақт сарфлагани, етиб келиши билан қўлига зарур қуроллар рўйхати тутқазилганини айтиб берди.
“Мен уларга ‘Биз Amazon эмасмиз’ деб айтим”, — эслади вазир.
Украина президенти Владимир Зеленский саммит чоғида ўтказилган матбуот анжуманида Украина ёрдам учун, жумладан, Буюк Британиядан ҳам “доим миннатдор” эканини айтди.
“Бундан ортиқ яна қандай миннатдор бўлишимиз кераклигини билмайман. Балки ҳар куни эрталаб турганда вазирга раҳмат айтишимиз керакдир. У менга қандай миннатдорлик билдириш кераклигини ёзсин, мен шундай қиламан” — деди Украина раҳбари.
Эртаси куни Украина элчиси Пристайко Sky News телеканалида гапирар экан, Зеленскийнинг сўзларини “нотўғри сарказм” деб атади. Дипломатнинг қўшимча қилишича, Украина Ғарбдаги ҳамкорлари билан қандайдир тушунмовчиликлар бўлиши мумкинлигини Россияга кўрсатмаслиги керак.
Кейинчалик Бен Уоллес Украина миннатдорлик билдирмаётгани ҳақида баҳсларга сабаб бўлган гаплари, аслида, нотўғри талқин қилинганини айтди.
Изоҳ (0)