Эрон ҳукумати Афғонистон фуқаросини гиёҳванд моддалар савдосига алоқадорликда айблаб қатл этди

Эронда 9 май куни Афғонистон фуқароси гиёҳванд моддалар билан савдо қилишда айбланиб, қатл этилди. Бу ҳақда Etilaatroz нашри хабар берди.

Манбада айтилишича, афғон фуқаросининг қатл этилгани тўғрисида дастлаб Эроннинг инсон ҳуқуқлари соҳасида фаолият юритувчи Hal Vash сайти хабар берган. Хабар кўплаб маҳаллий нашрлар томонидан тасдиқланган.

Афғонистонлик маҳбус Эроннинг Кирмон қамоқхонасида қатл этилган. Қатл тўғрисида унинг оила аъзоларига ҳам, танишларига ҳам хабар қилинмаган.

Манбада айтилишича, қатл этилган шахс исми Хон Муҳаммад Ишоқзай бўлган. У Афғонистон ғарбидаги Фараҳ вилоятидан бўлган.

Хон Муҳаммад Ишоқзай 40 ёшда бўлган. У оилали ва беш фарзанднинг отаси бўлган. Марҳумнинг оиласи ҳозирда Эроннинг Семнан шаҳрида яшаётгани маълум қилинган.

Семнан шаҳрида Хон Муҳаммад Ишоқзой гиёҳванд моддалар билан боғлиқ айблов билан ҳибсга олган. Шаҳар суди унга ўлим ҳукмини чиқарган ва у 9 май куни ижро этилган.

Эрондаги бир қанча нашрлар мамлакат бўйлаб яна беш нафар афғон фуқароси қатл этилганини маълум қилган. Қатл ҳукмлари асосан Эроннинг Машҳад ва Караж шаҳарларида ижро этилган.