2022 йилда Россиянинг Украинадаги ҳарбий амалиётлари бошланганидан кейин Европа Иттифоқи давлатларининг мудофаа бюджети 20 фоизга ошди.
Бу ҳақда Европа комиссияси раҳбари Урсула фон дер Ляен Брюсселда бўлиб ўтган Европа мудофаа саноати конференциясида маълум қилди. Унинг сўзларига кўра, бу ўсиш сўнгги йилларда ушбу соҳанинг етарли даражада молиялаштирилмагани билан боғлиқ.
“Бизнинг миллий ҳарбий бюджетларимиз 2022 йилга нисбатан 20 фоизга ошди ва бу маблағлар сўнгги йилларда ҳарбий соҳанинг етарлича молиялаштирилмаганини қоплашни бошлади”, — деди у.
Еврокомиссия раҳбари, шунингдек, самарадорликни ошириш учун Европа мудофаа саноатини раҳбарлик остида бирлаштиришга чақирди.
2023 йилда Европа Иттифоқи мамлакатлари мудофаага ялпи ички маҳсулотнинг ўртача 1,7 фоизини сарфлади. Бундан ташқари, Украинада жанговар ҳаракатлар бошланганидан бери Европа армиялари янги техниканинг 78 фоизини Европа Иттифоқига аъзо бўлмаган мамлакатлардан сотиб олди.
2024 йилда Германия НАТОнинг мудофаа харажатлари ялпи ички маҳсулотининг 2 фоизини ташкил этиш мақсадига биринчи марта эришади. Яқинда Европа Иттифоқининг дипломатияси раҳбари Жозеп Боррел ҳарбий харажатларни ялпи ички маҳсулотнинг 2 фоизидан кўпроғига ошириш зарурлигини эълон қилганди.
Шу билан бирга, Германия Иқтисодий тадқиқотлар институтининг (IFO) ҳисоб-китобларига кўра, баъзи Европа Иттифоқи мамлакатлари яқин келажакда мудофаа харажатлари бўйича ялпи ички маҳсулотнинг 2 фоизини ташкил этадиган НАТО мақсадига эриша олмайди. Бунинг асосий сабаби сифатида иқтисодиётнинг паст ўсиш суръатлари келтирилган.
Изоҳ (0)