“Россия Марказий Осиё давлатларининг асосий ҳамкори сифатидаги мавқеини сақлаб қолади” — Мантуров

Россия Марказий Осиё мамлакатлари учун асосий савдо шериги сифатидаги мавқеини сақлаб қолишда давом этмоқда. Бу ҳақда Россия саноат ва савдо вазири Денис Мантуров Тошкентдаги “Иннопром. Марказий Осиё” кўргазмасида маълум қилди, дея хабар бермоқда “Дарё” мухбири.

“Ўзаро савдомиз барқарор, ижобий динамикани қайд этмоқда. Россия иқтисодиётнинг базавий тармоқлари учун маҳсулотларни асосий етказиб берувчи сифатида фаолият юритиб, минтақа давлатларининг асосий савдо шериги сифатидаги мавқеини сақлаб келмоқда”, — деди Мантуров форумнинг ялпи мажлисида.

Унинг сўзларига кўра, сўнгги бир йилда Марказий Осиё давлатларидан Россия бозорига импорт деярли 12 фоизга ошган, бу биринчи навбатда “Россияда саноат ишлаб чиқаришининг яхши суръатлари фонида талабнинг ортиши” билан боғлиқ.

“Санкциялар жорий этилиши, айрим Ғарб етказиб берувчиларининг кетиши, шунингдек, дўстона бўлмаган давлатлар билан савдонинг қисқариши энг яқин ҳамкорларимиз учун янги имкониятлар очади”, — деб ҳисоблайди Мантуров.

У ўзаро товар айирбошлашнинг ўсишига транспорт-логистика инфратузилмасини ривожлантириш, Марказий Осиёда қўшма лойиҳаларни амалга ошириш ва миллий валютадаги тўловлар улушининг кўпайиши ҳам ёрдам бераётганини айтди.