АҚШ президенти Жо Байден унинг бедарак йўқолган амакисини Янги Гвинеядаги одамхўрлар еган бўлиши мумкинлигини айтди ва дипломатик можарога сабаб бўлди. Папуа-Янги Гвинея улар “одамхўрлар мамлакати” деган номга лойиқ эмасликларини билдирди. Бу ҳақда Bild хабар берди.
Байден 17 апрель куни Пенсилваниядаги сайловолди митингида Иккинчи жаҳон урушида ҳалок бўлган амакиси Эмброуз Финнеган ҳақида гапирган.
“У бир двигателли самолётларда парвоз қилган, Янги Гвинея устидан разведка парвозларини амалга оширган. Ўша пайтда одамхўрлар кўп бўлган ҳудудда унинг самолётини уриб туширишган. Жасад топилмаган, чунки Янги Гвинеянинг ўша қисмида ҳақиқатан ҳам кўплаб одамхўрлар бор эди”, — деган АҚШ президенти.
Кейинчалик Оқ уй президенти амакисининг самолёти 1944 йилда денгизда ғойиб бўлганини маълум қилган.
Папуа-Янги Гвинея бош вазири Жеймс Марапе Байденнинг баёнотидан ғазабланган ва унинг мамлакати “бундай ёрлиқларга лойиқ эмас”лигини айтган. У Папуа-Янги Гвинея ва Соломон ороллари уруш давридаги одам, самолёт ва кема қолдиқлари билан тўлиб-тошганини айтган.
“Мен президент Байденни Эмброуз Финнеган каби бедарак йўқолган ҳарбийлар тақдирини аниқлаш учун Оқ уйни Иккинчи жаҳон уруши қолдиқларини тозалашга мажбурлашга чақираман”, — деган Жеймс Марапе.
Изоҳ (0)