АҚШ президенти Жо Байден Миср президенти Абдулфаттоҳ ас-Сиси ва Қатар амири шайх Тамим бин Ҳамад Ол Сонийга мактуб йўллаб, гуруҳ гаровга олинган исроилликларни озод қилиш бўйича келишувга рози бўлиши учун ҲАМАСга босим ўтказишни сўради. Бу ҳақда Axios агентлиги хабар қилди.
“АҚШ президенти уларни ҲАМАСнинг келишувга рози бўлиш ва унга риоя қилиш мажбуриятини олишга чақирди”, — дейилади агентлик хабарида.
Маълум қилинишича, Марказий разведка бошқармаси директори Билл Бернс шу ҳафта охирида Исроилнинг “Моссад” разведка хизмати раҳбари Девид Барнеа ҳамда Қатар ва Мисрнинг юқори мартабали расмийлари билан Ғазода ҲАМАС томонидан гаровга олинганларни озод қилиш бўйича келишувни муҳокама қилиш учун Қоҳирага боради.
Порталнинг қайд этишича, пайшанба куни Исроил бош вазири Бенямин Нетаньяху билан телефон суҳбати чоғида Байден Қоҳирада бўлажак музокаралар раунди мавзусини кўтарган ва Исроил раҳбаридан келишув тузиш учун аввалгидан ҳам каттароқ ваколатларга эга бўлган музокарачиларни юборишни сўраган.
“У Нетаньяхуга гаровга олинганларни, шу жумладан, ҳозирда деярли олти ойдан бери ҲАМАС томонидан ушлаб турилган Америка фуқароларини озод қилиш учун ҳамма нарсани қилиш кераклигини тушунтирди”, — деди Axios манбаси.
Ҳозирда музокаралар олиб борилаётган келишув Ғазода олти ҳафталик ўт очишни тўхтатишни ва гаровга олинган 40 нафар аёлни, жумладан, ҳарбий хизматчиларни, 50 ёшдан ошган эркакларни ва оғир аҳволдаги эркакларни озод қилишни талаб қилади.
Бунинг эвазига Исроил 700 га яқин фаластинлик маҳбусларни, жумладан, исроилликларни ўлдиргани учун умрбод қамоқ жазосини ўтаётган 100 га яқин кишини озод қилиши керак, деб ёзади агентлик.
Изоҳ (0)