Буюк Британиядаги ноқонуний муҳожирлар Руандага депортация қилинади. Биринчи депортация 10-12 ҳафта ичида амалга оширилади. Бу ҳақда Британия бош вазири Риши Сунакка таяниб, The Guardian хабар берди.
Британия парламентининг юқори палатаси ҳукумат босими остида мамлакат ҳудудини ноқонуний кесиб ўтган мигрантларни Руандага депортация қилиш бўйича баҳсли қонун лойиҳасини қабул қилди. У Лордлар палатаси томонидан маъқулланган. Парламентнинг ҳар икки палатаси томонидан қабул қилинган қонун лойиҳаси Британия қироли Чарльз III томонидан имзоланганидан кейин кучга киради.
Аввалроқ Руандага ноқонуний муҳожирларни депортация қилиш 2024 йилнинг баҳорида бошланиши тахмин қилинганди. Риши Сунак кечикишда лейбористлар ва Лордлар палатасини айблаган. Мигрантлар тижорат чартер рейсларида олиб кетилади, бу мунтазам равишда амалга оширилади, бироқ бир рейсда қанча одам кетиши айтилмаган.
Руандага сармоя киритиш учун қочқинларни юбориш
Руанда билан ҳамкорлик қилиш ташаббуси биринчи марта Буюк Британиянинг собиқ бош вазири Борис Жонсон томонидан 2022 йилда эълон қилинган. Шартномада Лондон Руандага ноқонуний муҳожирларни юбориши ва Руанда иқтисодий ривожланиш учун Лондондан миллионлаб доллар сармоя олиши назарда тутилган.
Жонсоннинг ташаббуси Британия жамияти ва Европа Иттифоқи мамлакатларида кескин танқидларга сабаб бўлган. 2022 йил июнь ойида Британия расмийлари 30 нафар ноқонуний муҳожирни Руандага депортация қилмоқчи бўлган биринчи рейс сўнгги дақиқада Инсон ҳуқуқлари бўйича Европа суди қарори туфайли бекор қилинган.
Мамлакатнинг амалдаги бош вазири Риши Сунак 22 апрель куни Буюк Британиядан депортация қилинган муҳожирлар билан биринчи рейсларни 2024 йил июль ойида жўнатишга ваъда берганди.
Изоҳ (0)