Украина президенти Владимир Зеленский Россия билан конфликтни ҳал қилиш бўйича музокаралар бошланиши мумкинлигини айтди. Бу ҳақда у франциялик блогер Гуго Траверга берган интервьюсида маълум қилди.
“Биз барча муаммоларни ўз қарашларимиз билан ҳал қилиш учун ҳужжат тайёрлаймиз, уни душман томонга етказишда ва муҳокама қилишда тўғри вақт топамиз”, — деган у.
Зеленский шу тариқа Швейцарияда Украина бўйича бўлиб ўтадиган саммит натижаларини прогноз қилди. Шунингдек, у бугунги кунда дунёдаги вазият “Россия қўлида ўйнаётгани”ни айтди ва Киев русларнинг кучли томонларини тан олиши кераклигини таъкидлади.
Москва бир неча бор музокараларга очиқлигини билдирган. Жумладан, Россия Украинанинг босиб олинган ҳудудларини, яъни Луганск, Донецк, Запорожье ва Херсон вилоятларини, шунингдек, Қримни ўзиники деб тан олишни хоҳлайди. Украина ўз талаблари орасида санаб ўтилган барча вилоятлар Украина таркибига киришини таъкидлаб, ҳудудий ён босиш вариантини рад этади.
Швейцария расмийлари 2024 йил Украинадаги уруш юзасидан 80 дан 100 тагача бўлган давлат иштирокида тинчлик конференцияси ўтказишни режалаштирмоқда. Швейцария ташқи ишлар вазири Иняцио Кассис саммитга Россияни чақиришни таклиф қилди, бироқ Украина бунга қарши.
Изоҳ (0)