Россия Федерал хавфсизлик хизмати Crocus City Hall’даги теракт бўйича олиб борилаётган жиноий тергов доирасида яна уч нафар гумонланувчини ҳибсга олди. Бу ҳақда The Moscow Times нашри хабар берди.
“Москва, Екатеринбург ва Омск шаҳарларида 22 март куни содир этилган терактга алоқадорликда гумонланган Россия фуқароси ва икки нафар Марказий Осиё минтақасидан келган фуқаролар қўлга олинди”, — дейилади федерал хавфсизлик хизмати хабарида.
Хабарда айтилишича, тезкор-қидирув тадбирлари чоғида қўлга олинганлардан икки нафарида ўқотар қуроллар борлиги аниқланган. Терактда қўлланган транспорт воситаларини сотиб олиш учун уларга пул ўтказиб берилгани айтилган.
Федерал хавфсизлик хизмати уч киши ҳибсга олинганини айтган бўлса-да, ҳуқуқ-тартибот идораси тарқатган видеода тўртта алоҳида шахс акс этган. Улардан бири вертолётда олиб кетилгани кўринган. Видеода ҳибсга олинганларнинг юзлари ёпиқ бўлгани учун уларнинг шахсини аниқлашнинг имкони бўлмаган.