Жаҳон банки Европа ва Марказий Осиё минтақаларида пул ўтказмалари 2023 йилда қарийб 78 миллиард долларни ташкил этишини маълум қилди. Россиядан Ўзбекистонга пул ўтказмалари ҳажми камайиб бормоқда. Бу ҳақда Жаҳон банкининг Ўзбекистондаги ваколатхонаси хабар берди.
Европа ва Марказий Осиё минтақаларида пул ўтказмалари 2021 ва 2022 йилларда мос равишда 15,5 ва 18,5 фоизга ўсган, 2023 йилда эса 1,4 фоизга қисқариши кутилмоқда. Бироқ пул ўтказмалари ҳажми Россиянинг Украинага бостириб киришидан олдинги ҳолатга нисбатан юқорилигича қолмоқда. Бу йилги кўрсаткичларнинг заифлиги асосан Россиядан қўшни давлатларга пул ўтказмаларининг секинлашиши билан боғлиқ.
Арманистон, Озарбайжон, Грузия, Қирғизистон ва Ўзбекистон каби Россиядан катта ҳажмдаги пул ўтказмаларини олган мамлакатларда уларнинг ҳажми босқичма-босқич камаймоқда.
Хусусан, Европа ва Марказий Осиё минтақасида энг кўп пул ўтказмаларини олувчи Ўзбекистонга пул ўтказмалари оқими 2022 йилдаги 16,7 миллиард доллардан (ЯИМнинг тахминан 21 фоизи) 2023 йилда 16,1 миллиард долларгача (ЯИМнинг тахминан18 фоизи) қисқариши тахмин қилинмоқда.
Ўзбекистонга пул ўтказмалари нега камаймоқда?
Россиядан пул ўтказмалари ҳажмининг камайишини Россия ҳудудларида ўзбекистонлик меҳнат муҳожирлари сонининг камайгани, Россияда инфляциянинг ўсгани ва ўзбек сўми курсининг Россия рублига нисбатан қимматлашгани билан изоҳлаш мумкин.
2023 йилда Россиядан пул ўтказмалари Украинадаги уруш бошланишидан олдинги — 2020-2021 йиллардаги даражадан анча юқори.
Россия Ўзбекистонга пул ўтказмаларининг энг йирик манбаи бўлиб қолмоқда ва бу мамлакатга юборилган умумий пул ўтказмаларининг қарийб 80 фоизини ташкил этади. Таққослаш учун, 2019–2021 йилларда Россиядан юборилган пул жўнатмалари Ўзбекистонга ўтказилган жами пул ўтказмаларининг ярмини ташкил қилган.
Изоҳ (0)