Қирғизистонда 5 апрелдан бошлаб Россиянинг MИР тўлов тизими карталарига хизмат кўрсатиш тўхтатилади. Бу ҳақда “РБК” хабар берди.
Маълум қилинишича, тегишли қарорга АҚШнинг MИР тўлов тизимининг оператори — Миллий тўлов карталари тизимига (НСCП) қарши санкциялари сабаб бўлган. “Элкарт” маҳаллий тўлов тизими оператори 3 апрелдан MИР карталарига хизмат кўрсатишни тўхтатади.
Қирғизистонда MИР карталари хизмати мамлакат тўлов тизимига нисбатан “иккиламчи санкциялар хавфини минималлаштириш” мақсадида тўхтатилган. Қирғизистондаги банкоматлардан нақд пул олиш ёки MИР картасидан пул ўтказиш, интернет тўловларини амалга ошириш мумкин бўлмайди.
MИР карталари Қирғизистонда 2019 йилдан бери иккита тўлов тизими — Россиянинг MИР ва Қирғизистоннинг “Элкарт” интеграцияси доирасида ишлаётган эди. “Элкарт”да 21 та банк иштирок этади. Бироқ Қирғизистонда MИР карталарининг ишлаши билан боғлиқ биринчи муаммолар 2022 йилнинг кузида бошланган. Ўшанда АҚШ Молия вазирлиги NSPK билан ҳамкорлик қилган хорижий молиявий ташкилотларни жазолаш билан таҳдид қилганди.
Эслатиб ўтамиз, 30 мартдан бошлаб Арманистон банклари Россиянинг MИР карталарига хизмат кўрсатишни тўхтатган.
Изоҳ (0)