Туркиянинг иккита йирик банки МИР карталари билан операцияларни тўхтатди

Туркиянинг энг йирик банклари İşbank ва DenizBank Россиянинг МИР карталарига хизмат кўрсатишни тўхтатди. Бу ҳақда Bloomberg хабар бермоқда.

Агентлик бу қарорни АҚШ санкциялари қўлланиши мумкинлиги фонида қабул қилинган деб ҳисобламоқда.

Аввалроқ АҚШ МИР карталари туфайли хорижий банклар учун санкциялар хавфини эълон қилганди. 

İşbank Туркиядаги биринчи давлат банкидир. 20 миллионга яқин мижозларга хизмат кўрсатади, Туркияда 1205 ва хорижда 22 та филиалга эга. 

İşbank — 2019 йил апрель ойида Туркияда биринчи бўлиб МИР карта хизматини тақдим этди. DenizBank’нинг Туркияда 708 та, бошқа мамлакатларда 43 та филиали мавжуд. 

Банкнинг мижозлар базаси 11,8 миллиондан ортиқ кишини ташкил этади. Банк МИР картаси билан операцияларни май ойидан бошлаб амалга ошира бошлаган эди.

15 сентябрь куни АҚШ ғазначилиги Мир тўлов тизимидан Россиядан ташқарида фойдаланишни йўлга қўйганлик учун санкциялар қўллашга тайёрлигини маълум қилди. 

Ўша куни Financial Times газетаси АҚШ ва Европа Иттифоқи Туркияга Россиянинг санкциялардан қочишига йўл қўймаслик учун босим ўтказаётгани ҳақида хабар берди. 

Нашр таъкидлашича, АҚШ ва Европа Иттфиоқи Анқарани мамлакат банкларида МИР тизимидан фойдаланишни тўхтатишга чақирмоқчи. 

İşbank ва DenizBank’дан ташқари, МИР карталари билан операциялар Туркиянинг учта йирик банклари — VakfBank, Ziraat Bank ва Halkbank томонидан амалга оширилади.

МИР карталари билан боғлиқ операциялар Ўзбекистонда ҳам амалга оширилади.