Қизилтоғ ва Аччиқкўлда дам олувчилар хавфсизлигини таъминлаш учун Миллий гвардия ҳамда ИИБ ходимлари бириктирилди

Айни кунда Тошкент вилоятининг Паркент туманидаги Қизилтоғ ҳамда Аччиқкўл дам олиш масканларида юз минглаб маҳаллий сайёҳларни учратиш мумкин. Ям-яшил далалар қўйнида аҳолининг табиатга нисбатан шафқатсиз муносабати ва шахсий автомобилларнинг хавфли ҳаракати кўпчиликни сергаклантирарди. Дам олишга борувчиларнинг аксарияти шундан шикоят ҳам қилган. Куни кеча тармоқларда тарқалган видео — Matiz автомобилининг пастликка қулаши ҳам айнан шу ҳудудда содир бўлгани дам олувчиларни янаям огоҳликка ундади. Тошкент вилояти ҳокимлиги ташаббуси билан ташкил этилган пресс-турда жорий мавсумда шундай кўнгилсиз ҳолатларнинг олдини олиш учун қандай ишлар амалга оширилгани ҳақида маълумот берилди. 

Республикада фаолият юритувчи ОАВ вакиллари дастлаб вилоятнинг Паркент туманидаги Қизилтоғ кенгликларида бўлиб, ҳудудда амалга оширилган ишлар билан танишди. 

Тадбирда сўз олган масъулларнинг маълумот беришича, туманда бугунги кунда 440 ўринли 4 та меҳмонхона, 134 ўринли 2 та дам олиш маскани ва 100 дан ортиқ оилавий меҳмон уйлари ҳамда 50 га яқин умумий овқатланиш шохобчалари мавжуд.

2023 йилда туманга дам олиш учун келган маҳаллий сайёҳлар 863 минг нафар кишини ташкил этган бўлса, хорижлик туристлар 45 минг нафар бўлган. Жорий йилда 894 минг нафарга яқин маҳаллий, 118 минг нафарга яқин хорижий туристларни жалб қилишни олдимизга мақсад қилиб олганмиз. Бунинг натижасида Паркент туманининг туристик салоҳияти 2021 йилга нисбатан 3,5 баробарга ошади, — дейди туман ҳокимлиги масъуллари. 

Билдирилишича, дам олиш масканларида аҳолининг хавфсиз дам олиши, одамларнинг табиатга нисбатан шафқатсиз муносабати, шунингдек, автомобилларнинг тартибсиз ҳаракатини назоратга олиш мақсадида Миллий гвардиянинг вилоят бошқармаси ҳамда вилоят ИИБ ходимларидан иборат жамоа бириктирилган.

Миллий гвардия бошқармасидан 100 нафар, вилоят ИИБдан эса 150 нафар ходим ҳудудга бириктирилиб, аҳолининг хавфсиз дам олиши, табиатга зарар етказмаслиги ва автомобилларнинг ўзбошимча ҳаракатларини назорат қилиш масъулияти юклатилган, — дейди Миллий гвардиянинг вилоят бошқармаси бошлиғи ўринбосари.

Пресс-тур давомида очиқланишича, тумандаги дам олиш масканларига келувчи туристлар асосан “Физика-Қуёш” илмий ишлаб чиқариш бирлашмасидаги Қуёш печлари, “Ҳазрати Али” зиёратгоҳи, “Заркентота” зиёратгоҳи, “Заркент” санаторияси, “Крюшон” виночилик уйи, Сўқоқ қишлоғида жойлашган “Чашма булоғи”га, Сўқоқ дам олиш уйлари ва чойхоналарига, Чотқол биосфера қўриқхонасига боради.

Тумандаги дам олиш масканларига келувчиларнинг хавфсизлиги, табиатга қилинаётган шафқатсиз муносабатнинг олдини олиш учун кузатув камералари, огоҳлантирувчи белгилар ўрнатилган. Дам олувчилар учун биоҳожатхоналар қурилган. Қолаверса, баланд тепаликларга чиқиб хавфли ҳаракатларни амалга оширувчи автомобиллар ҳаракатини чеклаш учун тепаликларга чиқиш йўллари қазилиб, ўтиш чеклаб қўйилган.

Бундан ташқари, айни кунда тумандаги Қизилтоғ шаҳарчаси ва Бўстон ҳудудидаги Аччиқкўл кўли атрофида лола сайли, варраклар сайли, оилавий ва жамоавий пикниклар учун қулай шароитлар яратилган.