Qiziltog‘ va Achchiqko‘lda dam oluvchilar xavfsizligini ta’minlash uchun Milliy gvardiya hamda IIB xodimlari biriktirildi

Ayni kunda Toshkent viloyatining Parkent tumanidagi Qiziltog‘ hamda Achchiqko‘l dam olish maskanlarida yuz minglab mahalliy sayyohlarni uchratish mumkin. Yam-yashil dalalar qo‘ynida aholining tabiatga nisbatan shafqatsiz munosabati va shaxsiy avtomobillarning xavfli harakati ko‘pchilikni sergaklantirardi. Dam olishga boruvchilarning aksariyati shundan shikoyat ham qilgan. Kuni kecha tarmoqlarda tarqalgan video — Matiz avtomobilining pastlikka qulashi ham aynan shu hududda sodir bo‘lgani dam oluvchilarni yanayam ogohlikka undadi. Toshkent viloyati hokimligi tashabbusi bilan tashkil etilgan press-turda joriy mavsumda shunday ko‘ngilsiz holatlarning oldini olish uchun qanday ishlar amalga oshirilgani haqida ma’lumot berildi. 

Respublikada faoliyat yurituvchi OAV vakillari dastlab viloyatning Parkent tumanidagi Qiziltog‘ kengliklarida bo‘lib, hududda amalga oshirilgan ishlar bilan tanishdi. 

Tadbirda so‘z olgan mas’ullarning ma’lumot berishicha, tumanda bugungi kunda 440 o‘rinli 4 ta mehmonxona, 134 o‘rinli 2 ta dam olish maskani va 100 dan ortiq oilaviy mehmon uylari hamda 50 ga yaqin umumiy ovqatlanish shoxobchalari mavjud.

2023-yilda tumanga dam olish uchun kelgan mahalliy sayyohlar 863 ming nafar kishini tashkil etgan bo‘lsa, xorijlik turistlar 45 ming nafar bo‘lgan. Joriy yilda 894 ming nafarga yaqin mahalliy, 118 ming nafarga yaqin xorijiy turistlarni jalb qilishni oldimizga maqsad qilib olganmiz. Buning natijasida Parkent tumanining turistik salohiyati 2021-yilga nisbatan 3,5 barobarga oshadi, — deydi tuman hokimligi mas’ullari. 

Bildirilishicha, dam olish maskanlarida aholining xavfsiz dam olishi, odamlarning tabiatga nisbatan shafqatsiz munosabati, shuningdek, avtomobillarning tartibsiz harakatini nazoratga olish maqsadida Milliy gvardiyaning viloyat boshqarmasi hamda viloyat IIB xodimlaridan iborat jamoa biriktirilgan.

Milliy gvardiya boshqarmasidan 100 nafar, viloyat IIBdan esa 150 nafar xodim hududga biriktirilib, aholining xavfsiz dam olishi, tabiatga zarar yetkazmasligi va avtomobillarning o‘zboshimcha harakatlarini nazorat qilish mas’uliyati yuklatilgan, — deydi Milliy gvardiyaning viloyat boshqarmasi boshlig‘i o‘rinbosari.

Press-tur davomida ochiqlanishicha, tumandagi dam olish maskanlariga keluvchi turistlar asosan “Fizika-Quyosh” ilmiy ishlab chiqarish birlashmasidagi Quyosh pechlari, “Hazrati Ali” ziyoratgohi, “Zarkentota” ziyoratgohi, “Zarkent” sanatoriyasi, “Kryushon” vinochilik uyi, So‘qoq qishlog‘ida joylashgan “Chashma bulog‘i”ga, So‘qoq dam olish uylari va choyxonalariga, Chotqol biosfera qo‘riqxonasiga boradi.

Tumandagi dam olish maskanlariga keluvchilarning xavfsizligi, tabiatga qilinayotgan shafqatsiz munosabatning oldini olish uchun kuzatuv kameralari, ogohlantiruvchi belgilar o‘rnatilgan. Dam oluvchilar uchun biohojatxonalar qurilgan. Qolaversa, baland tepaliklarga chiqib xavfli harakatlarni amalga oshiruvchi avtomobillar harakatini cheklash uchun tepaliklarga chiqish yo‘llari qazilib, o‘tish cheklab qo‘yilgan.

Bundan tashqari, ayni kunda tumandagi Qiziltog‘ shaharchasi va Bo‘ston hududidagi Achchiqko‘l ko‘li atrofida lola sayli, varraklar sayli, oilaviy va jamoaviy pikniklar uchun qulay sharoitlar yaratilgan.